Eveniment Top 12.09.2015

eveniment top 12.09.2015 Parlamentul European apruchie, Gioi,,meatrili di urgenţâ minduiti di prezidentul ali Comisii Europeanâ, Jean-Claude Juncker, mutrinda numirlu a refugiaţlor pitricuţ tu cathi vâsâlii dit Uniunea Europeanâ.Tu unâ rezoluţii apruchiatâ Strasbourg ...

 

 

Apofasi mutrinda catandisea a refugiaţlor

Parlamentul European apruchie, Gioi,,meatrili di urgenţâ minduiti di prezidentul ali Comisii Europeanâ, Jean-Claude Juncker, mutrinda numirlu a refugiaţlor pitricuţ tu cathi vâsâlii dit Uniunea Europeanâ.Tu unâ rezoluţii apruchiatâ Strasbourg cu unâ mari magioritati a euro-deputaţlor, easti giudicatâ, tu idyul chiro, “greaua lipsâ di achicâseari, di solidaritati a guvernilor andicra di aţei ţi caftâ agiutor".

 

Autorităţli naţionali nica minduiescu ayoriea tu ţi mutreaşti catandisea a refugiaţlor. Bucureşti, prezidentul Klaus Iohannis dzâsi că andrupaşti apruchiarea a refugiaţlor. Schema di mutari, icâ di pitriţeari di urgenţâ a refugiaţlor tu vâsâlii membri ali UE mutreaşti ca România s-l’ia 4646 di refugiaţi, ma multu andicra di aţei 1785 ţi lipseau prota.

România nu poati s-aproachi un numir ma mari di putearea ţi u ari la nivel naţional, dzâsi ministurlu di Externi, Bogdan Aurescu: “Lipseaşti s-andridzem lucârli, problemili nica di la originea lor, icâ tu vâsâliili dadâ a aluştor imigranţâ. Lipseaşti s-videm, tu iyul chiro, diferinţili mutrinda aţel ţi easti un refugiat tu nomurli dit ONU şi aţel ţi easti imigrantu icunumic.”

 

Problemi cu giustiţia ti Sorin Oprescu

 

Tribunalu Bucureşti câftă arestarea ti 30 di dzâli a primarlui di Bucureşti, Sorin Oprescu, ti aruşfeti. Apofasea nu easti definitivâ, ama easti cu numâ executorii. Al Sorin Oprescu, îi si aduţi câbati că ari luatâ 10% dit contractili anzrâpsiti dit pâradz publiţ – el fu arestat dupu ţi ari luatâ 25.000 di euro ditr-un întreg di 60.000 câftaţ, s-pari că ari luatâ di la patru oamin’i, cu agiutorlu a nâscântui lucrâtor sumordonat.

Unlu dit aţei patru cari lu-aspusirâ dzâţi că I-ari data al Sorin Oprescu 1 milion di euro, tu chirolu 2013 - 2015.  Ta s-da giuiapi ti apofasea lor di arestari, giudicâtorl’ii spun că edilu ştea că aţei 25 di n’ii di euro earau mitâ şi nu ampârmut, aşi cum avea dzâsâ aestu dit soni.

Tu idyul chiro, instanţa caftâ arestării di turlii preventivâ câ ţe Sorin Oprescu poati s-azburascâ cu martorl’ii dit anchetâ, maxus că mulţâ di ei suntu sum cumândisearea lui. Yeatur şi ma ninti membru al PSD (guvernari), Sorin Oprescu easti primar al câsâbălui Bucureşti dit anlu 2008. Curtea di Apel va s-giudicâ Luni contestaţia lui la aestâ apofasi di arestari. 

 

Andrupari europeanâ ti fermierl’ii român’i

 

Ministurlu român ti Agriculturâ, Daniel Constantin, câftă a ofiţialilor europen’i andrupari cât mai ayoniea, ahât ti fermierl’ii dit Românii agudiţ di câroari, ama şi ti producătorl’ii a curi criza dit sectorlu a laptilui lâ n’icşurâ amintatiţli. El s-dusi Bruxelles, la andamusea a Consiliului a Uniunâl’ei Europeanâ (Agriculturâ şi Pescuit), iu sâ zburâ ma multu mutrinda catandisea greauâ dit nâscânti sectoari agricoli la nivel european. Comisia Europeanâ hâbârisi un agiutor di 500 di milioani di euro ti agricultorl’ii europen’i.

 

Festivalu Enescu

 

Hiindalui cânâscut ca nai ma marli evenimentu cultural românescu, Festivalu Internaţional di Muzicâ "George Enescu", s-duţi ninti Bucureşti. Pânâ pi 20 di Yismârciun, va s-dizvârteascâ baia conţerti tu săli, ama şi baia evenimenti tnafoarâ, iu publiclu va s-hârseascâ di nai ma mărli orchestri dit lumi.

Cama di 3 n’ii di artişţâ român’i şi xen’i dit elita a muzicâl’ei clasicâ va s-alinâ pi sţena a festivalului. Dit nai ma cânâscutili orchestri ţi cântâ estan adarâ parti: San Francisco Symphony, Orchestra Operei dit Munchen, London Symphony Orchestra, Filarmonica dit Viena, Orchestra dit Sankt Petersburg, Filarmonica dit Monti Carlo icâ Orchestra dit Amsterdam.

Andreptu prota oarâ tu anlu 1958, la trei an’i di la moartea a ghinicânâscutlui compozitor român, festivalu fu dânâsit 1971 di regimlu comunistu, ama ahurhi disnău tu anlu 1989 şi di atumţea lu avem la cathi doi an’i.

 


www.rri.ro
Publicat: 2015-09-11 12:01:00
Vizualizari: 545
TiparesteTipareste