Eveniment TOP - 5.12.2015

eveniment top - 5.12.2015 1 di Andreu - Dzua Naţionalâ ali Românii, fu yurtusitâ di român’ii di iuţido. Umplearea a 97 di an’i di la adunarea, unirea a tutulor român’ilor t-unâ goalâ vâsâlii fu yurtusitâ aoa, tu vâsâlii, ama ş-tru xeani...

Român’ii yurtusirâ Dzua Naţionalâ

 

1 di Andreu - Dzua Naţionalâ ali Românii, fu yurtusitâ di român’ii di iuţido. Umplearea a 97 di an’i di la adunarea, unirea a tutulor român’ilor t-unâ goalâ vâsâlii fu yurtusitâ aoa, tu vâsâlii, ama ş-tru xeani, prit adunări di turlii religioasâ, paradi militari icâ conţerti.

Bucureşti, n’ii di oamin’I dusirâ s-veadâ ghinicânâscuta urdinari militarâ, cari şi estan fu multu îmşatâ. Cama di 2.600 di militari şi specialişţâ, amaxi di alumtâ, amaxi blindati, aeroplani Hercules şi Spartan, ama şi elicopteri urdinarâ dinâintea a Parlamentului.

 

Anamisa di soldaţl’ii român’i, vinirâ şi soţ dit Republica Moldova şi Vâryârii, SUA, Polonia şi Turchia. Unâ premierâ anlu aestu fu şi un detaşamentu adrat di militarl’ii roman’i agudiţ tu teatrili di operaţii dit Balcan’ii di Vestu, Irak şi Afganistan. La paradâ vinirâ analti oficialităţ dit vâsâlii, cum suntu prezidentul Klaus Iohannis şi premierlu Dacian Cioloş. Doil’ii s-aspusirâ ti un nau ahurheari tu ţi mutreaşti di practica şi minduita, ti tin’isearea a seamnilor naţionali, ama şi a aţilor cari scot tu migdani valori tu soţietatea româneascâ.

 

 

Agiutorlu ali Românii tu NATO

 

Câ ţe caftâ s-andrupascâ dealihea afirearea dit partea esticâ a Suţatâl’ei NATO, România apruchie s-ţânâ, pi loclu a ei, Comandamentul Multinaţional di Divizii Sud-Estu şi Unitatea di integrari a puterilor soaţâ.

 

Ministurlu di Externi, Lazăr Comănescu, anyrâpsi, N’iiercuri, Bruxelles, achicâsearea prit cari s-asiguripseaşti cadrul giuridic ţi lipseaşti ti imnarea bunâ a aluştor structuri. Rolu cl’ieai ali României tu NATO şi agiutorlu a ei tu suţatâ furâ pricunânâscuti ofiţial şi di SUA. Udălu a Reprezentanţâlor di Washington apruchie unâ rezoluţii cu furn’iea a umplearâl’ei a 135 di an’i di la uidisiearea a ligâturilor diplomatiţi prit cari s-veadi tin’iea a Bucureştiului tu NATO şi rolu di bun soţ a Americâl’ei.

 

Actul mai “zburaşti” ş-ti rolu di mari simasii a parteneriatlui strategic tu promovarea a securitatâl’ei transatlanticâ şi regionalâ. Pi di altâ parti, tu aesti dzâli vinirâ tu Românii, dit Ghermânii, vârâ 70 di piesi di echipamentu militar american ţi furâ dusi la Baza Mihail Kogălniceanu

 

 

România alavdâ apofasea NATO mutrinda câlisearea a Muntenegrului ta s-intrâ tu suţatâ

 

Hiindalui Bruxelles, la unâ andamusi a minişţrâlor di Externi dit vâsâlii NATO, caplu ali diplomaţii di Bucuresti, Lazăr Comănescu, adusi aminti că di politica a uşilor dişcl’isi a Alianţâl’ei, s-hârsi şi România, cari intră tu NATO tu anlu 2004.

 

El dzâsi că vini oara, tora, ca Bucureştiul s-îi andrupascâ pi năil’ii viniţ. Lazăr Comănescu:  Easti di mari simasii, ca zboarâ, aestâ câliseari şi ti vâsâliili cari au ligâturi buni cu Alianţa. Am tu minti prota Republica Moldova, Georgia şi Ucraina. România alâvdă apofasea NATO ta s-câliseascâ Muntenegru s-intrâ tu suţatâ şi aşi, el va s-hibâ aţel de-al 29-lea cratur membru a Suţatâl’ei Nordu-Atlanticâ.

 

 

Proiectul di buget ali Românii pi anlu 2016

 

Ministurlu di finanţi, Anca Dragu, zburâ ti proţl’ii indicatori pi cari fu adrat proiectul di buget pi 2016. Ea dzâsi că yinitoarea proiecţii bugetarâ mutreaşti, prota, asiguripsearea mutrinda stabilitatea şi predictibilitatea fiscalâ ţi lipsescu ti criştearea a pistil’ei tu mediul di emburlâchi şi stimularea a investiţiilor privati, ama şi unâ ufiliseari cama bunâ a resursilor bugetari.

 

Ministurlu hâbârisi că proiectul di buget mutreaşti criştearea a pensiilor cu ţinţi trâ sutâ şi crişterli di salarii dit sectorlu public, apufusiti di Parlament şi di aţl di ma ninti guvernu. Dragu mai dzâsi că suntu aştiptati si hărgi cama mări ti afireari, investiţii, sânâtati şi praxi.

Bugetlu easti adrat pi un defiţit ma n’ic di 3% dit PIB şi s-întimil’ieadzâ pi unâ crişteari icunumicâ di cama di 4 proţenti. Protili meatri fiscali ţi va s-intrâ tu practico anlu ţi yini mutrescu scâdearea a cotâl’ei standard di TVA di la 24% la 20% şi la scâdearea a impozitilor pi dividendi di la 16% la 5%.

 

 

 

 

 

 

 

 

 


www.rri.ro
Publicat: 2015-12-04 12:32:00
Vizualizari: 601
TiparesteTipareste