Simona Halep, anãchisitoari la Roland Garros

simona halep, anãchisitoari la roland garros Românca Simona Halep amintă Openlu ali Franţă tru ună finalâ cu americanca Sloane Stephens şi aestă turlie cundi’eadză harea di nai ma bună agiucătoari di tenis a lumil’ei.

Simona Halep amintă Parislu şi lumea tută. Aprăftăsi tăşi la a treia aradă a aluştui mari şlem. Vahi ti aţea emoţiile fură di mări ş-ma mări, a deapoa tru aţel dit soni game duchea că nu mata poati s-adil’e, aşi cum spusi tru bitisita a partidăl’ei românca pi ilikia di 26 di an’i di fară armãnească. „Easti ti nipistipseari. Anyisaiu s-agiungu tu aestă aradă di cându ahurhiiu s-agioc tenis”, declară campioana di la Roland Garros, ediţia 2018. Agiumsi aoa pi calea mplina di ambodyiuri, nu dip lişoru. Tru 2014, chirea finala di Paris dinintea a cunăscutăl’ei Maria Sharapova, arusoaica cari tru kirolu di tora, cu zori ş-yini tru ori, dimi tru forma di agioc, după suspendarea ti dopaj. Tru 2017, kiru dinintea a letonăl’ei Jelena Ostapenko, cari u lo pi napandica cu giunamea a l’ei şi vărtuşamea a aguderlor cu racheta. Anlu aestu, Simona Halep agiuca si chirea treia finală di Mare Şlem dit carieră cu daneza Caroline Wozniacki, şi ea cu nădie ma nu avu tihi la un trofeu di ună ahtari anvergură până tu oara a turneului di Melbourne 2018. Atumţea, ama, specialiştal’i spusiră că românca easti ndreaptă s-agiungă amintatoari, tru premieră, la un Grand Slam, a deapoa Roland Garros eara turneulu a l’ei tra cari spunea miraki s-lu amintă.

 

Tru anlu dit soni, agiumsi s-aibă un serviciu di bun ş-ma bun ş-cu agioclu la fileu şi alină tru nai cama marea scară cu agiooclu vărtos dinintea la iţi adversară. Maşi aşi aprăftasi s-pitreacă acasă tru cirecuri şi semifinali dauă amintătoari di Grand Slam, vărtoasili Angelique Kerber dit Ghirmănie şi Garbine Muguruza dit Spania. Tru finala di sâmbătă, americanca Sloane Stephens, ţi lu-ari amintată tiltulu la US Open, ahurhi cu mari hăiri agioclu, amintă protlu set şi break tru doilu, ama, dupu aestă, vidzu ună zori niacumtinată dinintea a livendăl’ei şi nicurmata Halep, cari alăxi mira a meciului tru favoarea a l’ei. Român’il’i ăl vor Parislu şi Parislu spuni vreari andicra di român’i. Aoa şi 45 di an’i, triumfa pi arina aroşi tenismenlu ţi nu ş-ari preacl’e dimec Ilie Năstase. Tinţi an’i ma amănat, tamam cu 4 dechenii tu ma năpoi, agiundzea diznău la aestă performanţă Virginia Ruzici, cari u andrupă şi fu ningă Halep tru tuţ an’il’i di alinari pi scara valorică a aiştei. Sicăgi cum daima să spuni, Năstase declară după hăirlăticlu ali Simonă că ăl’i dimăndă s-hibă 'gurmandă'/ să spună orixi ş-ma largu, ş-tru yinitu şi s-amintă şi alti turnee di Mare Şlem.

 

 

Presa internaţională hiritisi trofeulu amintat di Halep la Roland Garros, protlu di Mari Şlem dit palmareslu a l’ei. Cu numa  ''Halep avină fantomili'', site-ul ufiţial a turneului parizian aduţi aminti ti aţeali trei finali di ma năinti di Grand Slam ţi li kiru. Site-ul a circuitlui profesionistu feminin (WTA) ngrapseaşti că ''Halep amintă protlu trofeu di Mare Şlem, la Roland Garros'', deapoa cănăscutlu jurnal ''L'Equipe'' zburaşti ti „consacrarea” a Simonăl’ei Halep, a deapoa BBC dimănda, tru arada a lui, că Simona Halep amintă, ''păn tru soni'', protlu a l’ei titlu di Grand Slam, ''cu ună giunami mplină di curayiu dinintea ali americancă Sloane Stephens''. France Presse ngrăpseaşti că, ''neise, Simona Halep ş-băgă căruna''. Agenţia frănţească aleadzi dit spusili a Simonăl’ei cu zboarali ''un numir ună mondial ţi nu ari amintată un Grand Slam ari un sentimentu, ună dukeari di niifharistuseari''. Halep agiucă, sâmbătă, a 31-a finală dit carieră, a până tora ari amintata 17 di titluri. Prit hăirlăticlu a l’ei di Paris, românca di fară armânească ş-anvartuşi protlu loc tru clasamentul mondial.

 

 

Autor: Ştefan Stoica

Armanipsearea: Tascu Lala


www.rri.ro
Publicat: 2018-06-11 12:36:00
Vizualizari: 637
TiparesteTipareste