Europa a prezidentului Macron

europa a prezidentului macron Un documentu ti yinitorlu ali Europă, asumat di un lider francez, nu lipseaşti s-nă ciudusească dip multu. Construcţia a unitatil’ei instituţională a Europăl’ei nchisi di la un ahtari documentu, asumat di un lider francez, ministurlu di externi di atumţea

Un documentu ti yinitorlu ali Europă, asumat di un lider francez, nu lipseaşti s-nă ciudusească dip multu. Construcţia a unitatil’ei instituţională a Europăl’ei nchisi di la un ahtari documentu, asumat di un lider francez, ministurlu di externi di atumţea, fostul premier, Robert Schuman. Multi alti documenti, carti şi iniţiativi ali Uniuni Europeană poartă numili a francezlui cari inspiră ică coordonă elaborarea a lor. Ună carti pitricută a european’ilor di prezidentul ali Franţă tru aesti momenti complicati easti tamam ghini vinită. Di altă parti, autorlu a l’ei, Emmanuel Macron, easti un politician incisiv, cari spuni a lucărlor pi numă, cu ună carieră, di multi ori, pi contu propriu. 

 

La lansarea a cartil’ei, născăntă ş-băgară stranjlu galbinu, alţăl’i lu stipsiră autorlu ti campanie electorală tră aprucheatili alidzeri europarlamentari. Mulţă alţă, ama, apucheară mesajlu a cartil’ei stridusă tru nu ma puţăn di 22 di limbi ali Uniuni Europeană, aşe câ aestu s-nu hibă distorsionat. Acă pari un detaliu, mesajlu a aiştui procedeu easti limbid, him tru mplină eră a dezinforaril’ei şi a manipularil’ei a născăntor populi ntredz, inclusiv prit hăbărli falsi ica prit apriduteri contrafapti. 

 

Prezidentul Macron lugurseaşti că: "Dinintea a aiştor manipulări, noi lipseasti s-armânem fermi. Pirifan’i și limbidz. Să spunem prota ş-prota ţi easti Europa. Easti un succes istoric: reconcilierea a unui continentu autrusitu, tru un proiectu inedit di irine, di prucuchie și di libirtati." Piricl’iurli contemporane ţi fuvirsescu proiectul european suntuu babageani şi complexe, di turlii ţi nu s-au vidzută. Ase că, "vărnăoară nu fu Europa ma anănghisită di la doilu Polimu Mondial până ază, și vărnăoară nu fu dinintea a unlui nai cama mari piricl’iu andicra di chirolu di ază." 

 

Prezidentul Macron lugurseaşti că easti momentul ali Renașteri europeană a deapoa cartea a lui ari ună numă programatică, "Tra ună Renaşteri europeană". El pripuni nica şi trei direcţii di acţiune, pi cari li număseasti ambiţii. Easti zborlu ti libirtate, protecţie şi progres, sturi pi cari, ngrăpseaşti prezidentul francez, lipseasti s-construim Renașterea europeană. Cartea yilipseaşt, dimi, un cadealithea program cu puncte concrete, ti poati s-ncurpil’eadză principiile a unei xanaamintari a spiritlui european. S-pripune thimil’iusearea a unei Agenții europeană di protecție a democrațiilor, tra apărarea a proceslui electoral contra a atacurlor cibernetice și a manipulărlor, niapruchearea a finanțaril’ei tră partidili politice europeani di cătră puterli xaeani şi interzicerea a discursului di ură și di prişcăvil’e pi Internet. 

 

Tra protejarea a continentului european s-pripune, ntră altele, revizuirea lărgurie a principiilor spațiului Schengen, ună poliție di sinuri comună și un oficiu european di azil, un tratat di apărari și di securitate, tru simfunie cu NATO și cu aliațl’ii europen’i, reformarea a politicăl’ei di concurență, refondarea a politicăl’ei comerciale. Nyearea a spiritlui di progres spuni, tru minduita al Emmanuel Macron, cama multu ti convergență andicra di concurență. Europa, cari u thimil’iusi idheea di securitati socială, lipseasti s-bagă tru lucru un scut social cari s-garanteadză remunearație isa și ună tin’ie di cafi mes minimă europeană adaptată la cathi văsilie. 

 

Tu bitisita a cartil’ei prezidentul Macron năpoi aduţi tu moeabeti situaţia actuală, tru cari până şi proceslu Brexit easti tru impas, cu ixichi acutotalui di ună poziţie limbidă a decidenţălor, pradă a naţionalismului şi a euroscepticismului. "Adi s-șim dit aestă princă, adi s-dăm ună noimă a alidzerlor cari s-aproachi și ună matimă tră tuţ. Voi va s-apufusiţ desi Europa și valorli a l’ei di progres lipseasti s-armână ma multu di ună paranteză tru istorie. Easti alidzearea ţi vă u pripun, căţe maşi deadun va s-putem s-dişcl’idem calea ali Xanaamintari europeană", ş-bitiseasti prezidentul Emmanuel Macron cartea prit cari căliseaşti tră un lărguriu proces complex di redifiniri, ună Conferinţă tra Europa cari s-adună tamam dit aistu an, cetăţean’il’i european’n, tru un proces di xanaamintari şi redescoperiri ali Uniuni Europeană.

 

 

Autor: Marius Tiţa

Armânipsearea: Taşcu Lala 

 


www.rri.ro
Publicat: 2019-03-10 19:04:00
Vizualizari: 874
TiparesteTipareste