Hâbări ditu bana românească şi internaţională

hâbări ditu bana românească şi internaţională Regatlu Unit easti di jeali după ţi viniri, muri printulu Philip, duţi di Edinuburgh, nicukirlu a văsiloanillei Elisabeta a II-a. Marina Britanică ndreapsi, ază, ţeremonii tru ma multă căsăbadz ti adutearea aminti a prinţului Philip, cari lucră tu ipotise

Londra – Regatlu Unit easti di jeali după ţi viniri, muri printulu Philip, duţi di Edinuburgh, nicukirlu a văsiloanillei Elisabeta a II-a. Marina Britanică ndreapsi, ază, ţeremonii tru ma multă căsăbadz ti adutearea aminti a prinţului Philip, cari lucră tu ipotisea di ofiţer naval tru Doilu Polimu Mondial. Londra, oamini di tuti ilikiili şi categoriili suţiali dipusiră lilici şi mesaji di puryuruseari la poarta-a Pâlatillei Buckingham, reşedinţa di Londra a fumeiillei vâsilikeascâ, ama şi la Castelul Windsor. Guvernul cândâsi, ama, publiclu s-nu s-adunâ tu parei mări şi s-tiniseascâ distanţa di sigurlâki, a deapoa fumeallea vâsilikeascâ âlli cândâsi oaminilli s-facâ donaţii di agiutoru. Tutunâoarâ, Colegiul di Armi nâpoi âlu mutri protocolu funearar, tu simfunie cu regulili sanitari şi cu vrearea a prinţului Philip. Nu va s’tânâ arădz di ngrupari, di statu, a deapoa sfindukea nu va s-hibâ bâgatâ trâ videari dinintea a publiclui tră aţea ditu soni tiniseari. Truplu a Alteţâllei a Lui vâsilikească va s-arihâtipseascâ tru Castelul Windsor, ninti di înmurmintarea di la Capela St. George. Fumeiili vâsilikestâ şi lideri di lumea tutâ pitricurâ mesaji di puryuruseari si âlli adusirâ tiniseri a Prinţului Philip ali Mari Britanii, elogiat trâ dukearea ţi u spusi trâ borgea şi cilâstâsearea cu cari lucră tră hâirlâticlu a cratlui. Ditu România, Custodili a Cârunâllei Prinţipesa Margareta, hllina şi nipoata di cusurinu a prinţului, spuni că Vâsilonea Elisabeta a II-a şi Prinţul Philip armânu modeli spirituali şi izvuri di thimelliu cu inspiraţie trâ bârnulu di adzâ. Tutunâoarâ, prezidentulu Klaus Iohannis spusi că România easti deadunu cu fumeallea vâsilikeascâ şi cu populu britanic şi u spusi pistusinea că istoria va u tiniseascâ contribuţia a prinţului Philip.

 

 

Bucuresti – Romania năstricu, sâmbâtâ, praglu di unâ miliuni di cazuri di persoani infectati cu năulu coronavirus, dupâ isapea dimândată ti cama di 4300 di cazuri năi. 1492 di pacientâ suntu internaţ la terapie intensiva. Mulţâ pacienţâ suntu mutriţ trâ terapie intensivâ tru secţiile di aprukeari urgenţi, cu aştiptarea a unlui loc la ATI. Tut ma multi spitali dimândă că sunt la capacitate maximă. Autorităţli dimândarâ şi 139 di morţâ asociaţ cu COVID-19. Isapea a morţâloru ditu ahurhita a pandemiillei nâstricu 25.000. Guvernul prilundzi cu 30 di dzâli, ditu 13 di apriiuru, catandisea di alertă pi teritoriul ali Romanie di itia a pandemiillei de coronavirus, ama ţânu şi meatrili di sigurlâki sunt ananghi. Furâ, ama, hâbinisiti restrictiile tu kirolu a sărbătorloru trâ Paştili Ortodoxu. Tu idyiulu kiro, campania di imunizare anti-COVID easti tu ,plina dizvârteari tru Romania. Di la ahurhita a campaniillei di vaccinare, tu inşita a anlui ţi tricu, cama di 2,2 miliuni di persoani loarâ nai pţânu unâ doză di vaccinu.

 

Autoru: Udălu a hâbărloru

Armânipsearea: Taşcu Lala

 

 

 

 


www.rri.ro
Publicat: 2021-04-10 17:37:00
Vizualizari: 358
TiparesteTipareste