Hăbări ditu bana românească şi internaţională

VIZITĂ. Prezidentulu a Româniillei Klaus Iohannis, aflat tru aestu kiro u ună vizită oficială tru Emiratele Arabe Unite, călători adza la Masdar City, un modil di dizvultare urbană durabilă cu cearei ţi au tu amprotusa hăirlătica energetică și protecția fisillei. A oficialui român ălli fură părăstisiti cearei tră transport și arăţiri și ventilație urbană, generarea di energie a clădirilor și ufilisearea optimă a videalăllei naturale tru școli și instituții di cercetare. Ceareili testate tru Masdar City pot s’hibă ună inspirație tră alţă căsăbadz tut ma sinfirisiţ ti sustenabilitate, inclusiv tru România. Contribuțiile la aesti cearei yin, ntră altile, și di la cercetători români, afiliaț a institutelor di cercetare ditu căsăbălu Masdar, spusi prezidenţillea ali Românie tru un comunicat di presă. Prezidentulu Iohannis va s’şeadă tru Emiratele Arabe Unite până marți, la călisearea a omologlui a lui, șeiclu Mohamed bin Zayed Al Nahyan. Protili obiective a vizităllei includ anvărtuşearea a dialoglui politic și diplomatic pi teme di sinferu reciproc, dari curayilu ti ligăturli economice bilaterale, cari sunt di ma multu kiro pi un trend pozitiv semnificativ, și trădzearea di investiții tru economia românească pritu proiecte tru domenii catacum infrastructură, energie, climă, alăxeari, securitate cibernetică și securitate alimentară.

ARIFUGAȚ. Inspectoratlu General ali Poliție di Sinuru Române dimăndă că sâmbătă 86.342 di persoane intrară tru România ufilisinda punctili di sinuru ditu tută văsilia. Ditu aeşţă, 8.510 era cetățeni ucraineni. Ditu 10 di şcurtu 2022, cu dauă stămâni ninte di invazia rusă a văsiliillei a lor, aproapea 3,8 milioane di cetățeni ucraineni intrară tru România. Nai ma mulţă di elli urdinară ma largu calea tru văsiliili vest-europene, ama anvărliga di 100.000 ditu elli aleapsiră s’armână tru România, uidisitu cu spusa a autoritățlor di la București.

CILIMEANI. Poliția di sinuru nkidică cama di 5.300 di cilimeañi români s’treacă sinurlu nafoara a v4siliillei tru 2022, di itia că părințăllii a lor ică adulțăllii cari eara deadunu cu elli nu putură s’prezinta documentele ţi eara ananghi tră scuterea a cilimeañiloru ditu văsilie. Ministerul di Interne dimăndă dumănică că numirlu easti di dauă ori ma mari andicra di anlu di ma ninti. Tutunăoară, di la ahuhrita a anlui 2023, piste 800 di cilimeañi români fură dănăsiţ la sinuru di itia că nu avea documentili di călătorie valabile, a părintilui ansoțător fără izini di partea a alăntui părinti ică tră aţea că adulțăllii care eara cu elli, alțăllii andicra di părință, nu putură s’prezintă caziere judiciare limbidz. Uidisitu cu nomlu, cilimeañilli români pot s’iasă ditu văsilie maş pi thimellilu a unui documentu di călătorie, pașaport ică ună carte di identitate valabilă, cu condiția s’hibă cu elli un adultu și s’aibă acordul a părințăloru.

Autoru: Udălu a hăbărloru

Armânipsearea: Taşcu Lala