Naetea a Guvernului ti adoptarea a proiectilor di ordonanţi mutrindalui graţierea colectivă şi nascanti alaxeri la Codul penal cari va s-dezincrimineadza parţial fapti penali scoasi tru migdani daldza babageani di indignare tru România. Ordonanţili, promovati di Ministerlu ali Justiţie, scoasira n’il’i di oamin’i pi geadei Bucureşti şi tru marl’i casabadz a vasiliil’ei, iu s-tanura protesti andicra di nomurli pi cari Guvernul Grindeanu vrea s-li adopta stămâna ti tricu. Manifestanţal’ii minduescu că inculpaţ ica condamnaţ celebri, persoanaji influenti dit clasa politică ica dit administraţie au cabilea s-iasa dit hapsani ica pot s-cafta ncl’idearea a dosarilor.
Isisi prezidentul Klaus Iohannis sa spusi contra a aistor alaxeri a nomurlor dit justiţie şi nchisi procedurli ti organizarea a unui referendum pi aestă temă. Pi thimel’ilu a Nomlui mutrindalui transparenţa decizională tru administraţia publică, luni, Ministerlu ali Justiţie va s-ndreaga una dezbateri publică mutrindalui proiectili di OUG. Una campanie babageană di dezinformare dus la mintireasili dit spaţiul public pi aestă temă, a deapoa a ordonanţilor nu va la zn’iipseasca dutearea ma largu a alumtal’ei contra ali corupţie, spusi prezidentul a Senatlui, Călin Popescu Tăriceanu, la postul public di radio: Nu ari niti una pideapsă di corupţie cari s-hibă graţiată, nu suntu graţiati pedeapsili a atilor cari featira acti cu priscavil’e, vatamari, violuri, nu ari niti una turlie di prevediri di amnistie tra s-lugurseasca ca easti zborlu ti vara dedicaţie, aşi cum sa zbura.
Di alanta parte, principalul partid di opozitie dit Parlamentu, PNL, fuvirseasti cu moţiunea di cenzură tru cazlu a adoptaril’ei di cătra Executiv a atilor dauă ordonanţe. Prezidentul interimar a libearalilor, Raluca Turcan: Iniţiativa a guvernului tra s-baga ninta a bugetlui di stat ordonanţe mutrindalui graţierea şi alaxearea a Codlui Penal tra mustiradzl’i dit politică spuni că di faptu guvernul nu cilastaseasti ti problemilie reale ti li spusi tru campania electorală, ca masi ti interesele a atilor cari graviteadză anvarliga di pareia di apufuseari. Consiliul Superior a Magistratural’ei deadi aviz negativ ti proiectili di ordonanţă di urgenţă. Avizlu, ama, easti consultativ. Procurorlu general ali Românie, Augustin Lazăr, sumlinie tru arada a lui, că nu easti zborlu ti niti una urgenţă: Eali au tru scupo sa slagheasca atea capacitate instituţională a statlui român tra s-alumta cu corupţia.
Discuţiile anvarliga a ordonanţelor di urgenţă mutrindalui graţierea a nascantor pideapsi şi alaxearea a Codlui penal şi di procedură penală s-fac tru contextul tru cari România easti anamisa di protili trei vasilii dit Europa cu nai cama multe condamnări la Curtea Europeană a Ndrpturlor a Omlui. Iara uidistu cu prezidentul a Curtil’ei, Guido Raimondi, nai cama multi di aesti spun ti condiţiile dit hapsan’i.
Autor: Leyla Cheamil
Armanipsearea: Tascu Lala