CUM S-FEAŢI PUPĂZA
Adunat dit lao, Cruşuva tu Machiduni, di Ion Şcodreanu ş-publicat tu rivista “Frãtil’ia” No. 7, pag. 109.
Ţi ş-eara, ma nu ş-eara.
Eara unã mul’iari şi un bãrbat.
Dupã mult ańi, Dumnidză lă deadi una feată. Di dzuă-dzuă feata criştea. Muşuteaţa-a l’ei eara avdzătă tu tuti horli di deanvărliga. Nu tricu multu chiro şi mul’iarea muri. Bărbatlu si nsură ş-lo altă.
Aestã s-tihisi multã anapudã ş-u bãtea mãrata di featã ti ici tiva. Cãt yinea, inatea-a l’ei criştea şi vrea cu itido trop s-u chearã feata. Unã dzuã ãl’i deadi a featãl’iei un ucã di lãnã lai şi-l’i dzãsi:
— Na! lãna aestã, s-ti dut s-u lai ãn vali şi astarã s-u adut albã ca neaua.
Laea featã, cari ştea ti u-aşteaptã, cara s-nu ascultã dimãndãciunea a nãearcã-sai, lo truoarã lãna şi s-dusi n vali.
Lã sãhãt ãntredz, ma di ncot! lãna armãnea tut lai…
Cãtrã tu amurdziş, dicara vidzu cã tricu dzua fãrã ca lãna s-algheascã şi cãndu s-minduea la nãirirea şi batirea ti-l’i fãtea nãearcã-sa, s-alinã pi unã dzeanã, ş-anãltã mãnili cãtrã ter şi dzãsi cu boati mari:
— Pu! Pu! Dumnidzale, am nu mi fãteai un pul’i s-ascap di nãsã?!
Şi Dumnidzã, cari agiutã a atilor ãndrepţă, u feaţi un pul’i a cui căntic lu-avdzãm primãveara dit ahurhita-a Aprilui şi pãn ti Sum-Chetru.