Tu 4-li di augustu, poetlu armân Vanghiu Dzega umplu 46 di an’i. Ti aţea, tu emisiunea a noastrâ di tora seara nâ minduim ş-vâ spunem ti bana ş-lucurlu a lui di poet.
Vanghiu Dzega s-amintă tu 4 –li di augustu tu hoara Ayiu Nicola dit R.Machidunia hil’iu a armân’ilor Nicola sh-Zoiţa Dzega, di la cari nviţă dulţili grai armânescu. Tinirlu Vanghiu ş-u cultivă limba ghivâsinda cărtâ ş-revisti armâneşti ş-cu chirolu ahurhi s-îngrâpseascâ stihuri pi armâneaşti. Tu anlu 1988 după ţi s-dusi Freiburg , tu Ghirmânie la un cursu di limbâ ş-culturâ armâneascâ organizat di Vasili Barba, cu itia a Congreslui ULCA. Cu aestâ itie lo ş-un premiu ti poeziili a lui muşati. Poeziili a lui ş-aflarâ loc tu revista “Zborlu a Nostr” dit Ghirmânie , ţi tu anlu 1997 îl’i publică tu numirlu 2 (55), un mânucl’iu di poezii di-a lui “Toarâ di zboarâ”. Easti însurat cu unâ armânâ ari doi ficiori ş-tora lucreadzâ tu Italie.
Vanghiu Dzega easti unâ prezenţâ activâ pi gruplu di discuţii Armânamea la cari aduţi contribuţie cu comentarii cu hazi ş-hâbări multu interesanti.
Tu minutili ţi yin vâ prezentăm îndauă di poeziili al Vanghiu Dzega ţi li aflăm tu “Antuluyia a poeziil’ei armâneascâ”, tomlu III, îndreaptâ di Ionel Zeana ş-publicatâ la Ed. Cartea Aromână tu anlu 2001.
(intră poeziile+ ilustraţie muzicală)