Iţi văsilie, cari ţi shibă mărimea ică semtea a llei geografică, ari ndreptul fundamental ta ş’apufusească calea, alianţili ditu cari va ta s’facă parte. Declarația u feaţi secretarlu general adjunctu al NATO, românlu Mircea Geoană, după bitisita, viniri dicseară, a andamusillei extraordinari a miniştrilor di Externe a NATO. Aeşţă s-andămusiră tru sistem di videoconferință tră muabeţ ti implicaţiile tră securitatea europeană a ascumbusearillei “nintimilleată şi niprovocată di forţe ali Rusie la sinurli ali Ucraina, cu nădie ti statutlu a llei di membru cu tuti ndrepturli al NATO. Aliațlli feaţiră ună apel cătă Moscova s’tragă măna di la retorica fuviroasă contra a viţiñiloru a llei, să-şi tragă forţele millitari, s’apridună mintireaşili ti catandisea adrată şi s’aleagă calea a dialoglui şi a irinillei.
Nrupămu suvearanitatea şi integritatea teritorială ali Ucraina. Şi himu adunaţ stogu ti apărarea şi vigllearea a tutulor Aliaţlor. NATO armâne dişcllisu ti unu dialog di substanţă tru cadrul a Consilliului NATO-Rusia ditu 12 di yinaru. Aestu va s’reprezinta ună oportunitate tră Rusia să-şi demonstreadză vrearea alithea ti dialog, diplomaţie şi tiñisearea-a angajamentilor şi normilor internaţionale. Nu va s’făţemu niţi unu compromis andicra di prinţipiile di thimelliu a securitatillei, pruvidzuti şi apufusiti tru Tratatlu di Washington – ngrăpsi Mircea Geoană pi Facebook.
La andamusea di urgență di viniri lo parti și ministrul di Externe ali Românie, Bogdan Aurescu, context tru cari aestu năpoi adusi aminti găilipsearea tu ligătură cu anvărtuşearea a prezenţăllei militară ali Rusiei tru viţinătatea Alianţăllei, ecum şi apelu ti dezescaladari. Anda adusi zborlu ti catandisea di tora complex aţea di securitate, ministrul Aurescu năpoi u spusi minduita a Bucureștiului mutrinda ananghea ti anvărtusearea a posturăllei di descurajari şi apărari a NATO pi turlie coerentă şi pănu di mardzină tru tută arădărikea ditu apirită, nica si la Amarea Lae. Tru un comunicat di presă a diplomațiillei române nica să spuni că Bogdan Aurescu declară că ndrupaşti abordarea duală a NATO tru ţi mutreaşti Rusia, nsimnănda emu tu misuri fermi şi credibile di descurajari, emu şi, pi aestă bază, tru dialog, fără să zñiipsească prinţipiili, valorli şi angajamentili cari reprezintă fundamentul a Alianţei. NATO ari — ditu videala al Bogdan Aurescu — ună borgi di mari simasie tră prezervari arhitectura europenă di securitate şi arada internaţională bazată pi reguli. El scoasi tu migdani, tutunăoară, importanţa ti dutearea ma largu a coordonarillei Alianţa cu Uniunea Europeană, ca stur-clleaie a comunitatillei occidentale, deadunu cu NATO, ama şi cu partenerllii a llei ditu viţinătati, inclusiv pritu nduparea a rezilienţălei aluştoru şi a politicăllei cu uşili dişcllise. Așteptatlu Consiliu NATO-Rusia ditu 12 di yinaru va s’hibă pretedatu, tru 11 di yinaru, di Comisia NATO-Ucraina.
Autor: Eugen Coroianu
Armânipsearia: Taşcu Lala