17 giudeți ditu Românii ş-Bucureşti furâ, marțâ, sum cod purticalishu di vimtu spidhos, ți adră zñii tu localităţ ditu 13 giudeți ş-tu Capitalâ. Vimtul avu, di arada, vitezi di 80-85 km/h, iara multu ândzeanâ, tu munti, spidha tricu di 120 km/h. Alanti părțâ di vâsilie furâ sum cod galbinu. Avu zñie ș-alimentarea cu energhie electricâ ș-fu tutnâoarâ ananghi di agiutorlu a pompierilor ta sâ scoatâ elementili di construcţie smulsi di vimtu, poñilli surpaț âmpadi şi sturlli ți câdzurâ pi geadei.
Maș tu Capitalâ, pompierlli lucrarâ la aproapea 300 di cazuri ti andridzearea a zñiiloru di ispetea a vimtului vârtos, iara tu giudețlu Ilfov, di ninga București, furâ 29 di urghenți. Uidisitu cu spusa a unlui comunicat al ISU, nai ma multili cripări s-feațirâ di itia a poñiloru câdzuț âmpadi pi geadei ică pi aftuchini, cata cumu ș-di itia a elementiloru di tablâ zmulsi di pi citia a adârâmintiloru, tencuiala dizlichitâ di pi binăi, ş-citiili asparti di pi casi di furña a sturloru câdzuț pi eali.
Tu vâsilie, urdinarea rutierâ/ a aftuchiniloru fu zñisitâ ti șcurtu chiro pi ma multi părțâ di călliuri di sibepea a poñiloru câdzuț pi geadei. Ma multu, avu zñii ti șcurtu chiro ș-urdinarea feroviarâ/calea di heru. Furâ asparti, tutnâoarâ, casi ș-acareti. Tut di ispetea a vimtului spidhos, s-feațirâ ș-ma multi aprinderi di focu.
Tu aestâ catandisi, aeronavi di astindzeari a foclui a Forţilor Aeriani Români lâ vinirâ a pompierilor tu agiutor ți s-alumta cu pirili a foclui. Acţiunili s-feațirâ cu zori di furñia a vimtului vârtos, ți dusi la tindearea cușia a piriloru. Tutnâoarâ, avu zñie alimentarea cu energhie electricâ tu ma multi localitâţ ditu ma multi giudeți. Pareili a distribuitorlor di energhie electricâ feațirâ gaireti ta s-andreagâ zñiili, tamam ș-București, iu furâ multi urghenți.
Primarlu a Capitalâllei, Nicuşor Dan, deadi asiguripseri că va s-ayuñiseascâ ritmolu di mutari a cablurlor tu subteran, ta s-nu s-facâ ahtări catandisi tu yinitoru. Uidisit cu spusa a primarlui gheneral, tu aeșțâ trei añi ditu soni fu scoasâ vârâ unâ ñilli di kilometri di cabluri di pi sturi ș-furâ alâxiț cu cabluri subterane. Tu ți mutreaști poñilli câdzuţ âmpadi, dzâsi elu, ti unu postu privatu di televiziuni, riscul s-cadâ âmpadi easti zori te-a spuneari di ninti, di sibepea a zârțiñloru ți pot s-hibâ tâlliati anda s-adarâ lucrări di mirimeti.
Ti dzâlili ți yinu, meteorologhilli dzâcu că va s-facâ ma câldurâ di cum lipsești tu aestu chiro ditu anu, tu nai ma marea parti a Românillei. Vimtul cama va s-ayâliseascâ, ama va s-hibâ cama spidhosu tu munti, ma multu tu Carpațlli di Apiritâ.
Autor: Daniela Budu
Apriduțearea: Mirela Sima Biolan