Informatu ică manipulatu? Filisearea a tehnologhillei dighitalâ ti fâțearea di sistemi axi s-adarâ lucri ți eara luyursiti, pânâ aoa ș-pțânu chiro, că potu s-hibâ adrati maș di oamiñi, easti, siyura, unâ revoluție istoricâ. Iara, tu unu chiro dipu șcurtu, progresili tu dezvoltarea a lucurlui ți lumea lu cunoști ti “yițrâmi artifițialâ” suntu dipu mări. Aesta easti filisitâ tu multi aplicații ditu bana di cathi dzuuâ – asistențâ virtualâ, diagnostiți medicali, apriduțeri automati, hâlăț di navigație, controllu a calitatillei tu proțeslu di fabricație i s-hibâ duchitu di ma ninti halazmolu natural (cutrimburări di loc, nicări di apâ).
Lucârli buni ți li adarâ yițrâllea artifițialâ yinu, ti amârtie, cu riscuri potențiali. Tehniț avansati di yițrâlli artifițialâ pot s-hibâ filisiti ta s-adarâ lucri foto ică audio-video mincinoasi, ți vor s-maipuleadzâ lișor duñeaua! Tamam tu Românie, ari di niscântu chiro videoclipuri cu oamiñi cu famâ ți da urnimii finanțiari ti investiția tu unâ companie i emburlâchi di iu poț sâ scoț mulțâ pâradz, cu riscuri dipu ñiț.
Sonlu și imaghinea suntu multu buni, s-pari că oamiñilli zburăscu dealihea ș-pot s-ti cândâseascâ , filisindalui zboarâ lișor ti achicâseari ș-argumenti buni. Videoclipurli suntu arâspânditi pi singirili di suțializari, suntu mutriti di miliuni di oamiñi, iara mulțâ di ațelli ți li vedu pot s-alasâ lișoru arâși ta s-investeascâ tu emburlâchea ti cari lâ si zburaști, ți easti dealihea paranomu, riscândalui s-chiarâ pâradz dipu mulțâ ti manipulatorlli ți adrarâ ațeali videoclipuri.
Tamam luni, Directoratlu Naţional di Securitati Ciberneticâ di București deadi tu padi unu ghidu pritu cari putemu s-lâ bâgămu oarâ a materialilor di turlie deepfake. Protlu scupo – s-achicâseascâ laolu riscurli di securitati ciberneticâ. Ghidlu ari informații ș-minutișuri ti ți va s-dzâcâ deepfake, proțeslu cumu suntu adrati ş-cumu putemu s-lâ bâgămu oarâ a materialilor di ahtari turlie. Ghidlu putemu s-lu aflămu pi site-lu dnsc.ro. El âlli anveațâ, tutnâoarâ, pi româñi ți lipseaști s-adarâ maca suntu victimi la unu ahtari deepfake.
Directoratul di Securitati Ciberneticâ fați tâmbihi că fenomenlu a manipularillei ali yițrâlli artifițialâ poati s-aducâ zñie, nu maș a unlui omu, ama ali unâ ântreagâ suțitati. S-nu agârșimu, bunâoarâ, că, estanu, tu Românie, va s-facâ tuti ațeali patru turlii di scrutini electorali. Tu dumeanea dighitalâ, iu sinurlu anamisa di ți easti dealihea ș-ți easti fândâzie s-așteardzi dipriunâ, proțeslu electoral treați di stâvrâsearea aplo a ideologhiilor ș-a tâxeriloru politiți, ama s-alâxeaști tu unu locu mintitu, complexu di alumtâ ideologhicâ. Ama, tehnologhiili deepfake, ți pot s-filiseascâ imaghini ș-boț dipu farsi/fârâ canâ câsuri, pot s—lâ alâxeascâ minduiarea ș-votlu/psiflu a oamiñiloru tu chirolu anda s-facu campaniili electorali. Ași că, angâtanu, bâgaț oarâ!
Autor: Roxana Vasile
Apriduțearea: Mirela Sima Biolan