Profesorlu de istorie Willy Wisoşenschi s-amintă tru 26 di mai 1946, tru hoara Mihail Kogălniceanu, giudeţlu Constanţa, cu dadă armână şi afendi di mileti ghirmană. Tru chirolu 1965-1968 feaţi studii la Institutlu Pedagogicu di Constanţa, deapoa fu profesoru la Şcoala Generală di Palazu Mic (1968-1976), Şcoala Generală ditu Piatra (1976-1982) şi Liceulu Teoretic di Mihail Kogălniceanu (1982-2011). Fu ancurunatu cu prof. Elena Wisosenski, ună bună soaţă emu tru planu personal emu tru aţelu profesional si di activismu cultural. Deadunu au dauă feati: Iulia Wisosenschi–dr. etnograf la Institutlu di Etnografie si Folclor Constantin Brăiloiu di Bucureşti şi Andreea Wisosenschi –filolog interpret la Ministerlu a Transporturlor di Bucureşti.
Willy Wisoşenschi easti thimiliusitorlu a Cercului di Istorie al Elevilor Dapyx” (1970), a Cercului de Istorie şi Tradiţii Aromâne Torna, torna, fratre” (1990), ali Fundaţie Culturală Muşata Armână” (2000), cum şi a Casăllei-muzeu aromână Gheorghe Celea” (2006). Profesorlu di Mihail Kogălniceanu easti iniţiatorlu a Parcului Arheologic Şcolar, a Festivalului Internaţional Deadunu tru Europa” (şase ediţii), a revigorarillei mutrinda cultivarea a dialectului matern aromân şi multi proiecti culturale. Willy Wisoşenschi easti ună prezenţă constantă la andamasili culturali şi ştiinţifiţi ditu văsilie, ama şi ditu xeani – Arbinuşia, Vărgăria, Gărţia, Macedonia -,cum şi tru emisiuni culturale la Radio şi TV. Activitatea a lui cultural-ştiinţifică dizvărtită pi hiotea a chirolui fu tiñisită cu ma multi premii cata cum: Premiul Omlu a Anlui 2008” (revista Bana Armânească”), Premiul Nicolae Batzaria” ică Premiul Nida Boga” (revista Dimândarea Părintească”), Premiul di excelenţă durusitu di Societatea di Cultură Macedoromână (2021), premiul di tiñie durusitu di Radio România Internaţional.
Tiñisitu idyealui emu di cătră elevi şi profesori, di ansamblul a comunitatillei ditu Mihail Kogălniceanu, ama şi de soţlli a lui aromâni (pi linie maternă) şi ghirmani (pe linie paternă) ditu văsilie şi xinătati, easti, pritu activitatea a lui didactică şi culturală, un anveţu tră soţlli a lui ma tiniri, dimi profesorlu Willy Wisosenschi armăni un exemplu de profesionalismu şi, tutunăoară, autentic patriotismu”, aşi cum lu zuyrăpsi prezidentulu ali Filială Constanţa a Societatillei de Ştiinţi Istorice ditu România, conf. univ. dr. Stoica Lascu, cari adăvgă: Tră noi, dobrogeñilli, perieghezele a lui arheologhiţi, iniţiativili culturale de la Mihail Kogălniceanu, multe ditu arada a loru cu impactu şi participări internaţionale, limbidzamea a lui ti loari atitudinea tră apărarea a limbăllei şi istoriillei româñilor nord şi sud-dunăreni ălu situeadză profesorlu Wisoşenschii anamisa di autenticilli intelectuali di adză ali Românie di la Amari”.
Dumlleartulu tu Paradhisu şi puryurii la jilita familie !
RRI – Secţia Armânească