Rezervili valutari ali Bancâ Naţionalâ a Românillei criscurâ meslu ți tricu ma s-adrămu biani cu livelul ânreghistrat tu bitisita a meslui șcurtu ş-tricu praglu di 64 di miliardi di evradz. Tu meslu marțu, s-feațirâ intrâri di 1,7 miliardi di evradz, reprezentândalui alâxearea a rezervilor minimi tu valutâ adrati di instituţiile di credit la BNR, alimentarea a conturilor a Ministerlui a Finanţilor ş-alti ahtări. Tutnâoarâ, s-fațirâ inșeri di 638 miliuni di evradz, reprezentândalui alâxearea a rezervilor minimi tu valutâ adrati di instituţiili di credit la BNR, plăț di rati ş-dobândzâ tu contul a borgillei publicâ numâsitâ tu valutâ, plăţ ditu contul a Comisillei Evropeanâ ș-alti. Livelul a rezervâllei di malmâ s-ţânu la cama di 103 toni, ama valoarea criscu la aproapea şapti miliardi di evradz, ti itia a criștearillei a pâhadzlor pi pâzarea internaţionalâ.
Analistul icunomic Constantin Rudniţchi dzâți că aesti depoziti âlli da izini ali Bancâ Naţionalâ s-asiguripseascâ unâ stabilitati a cursului di alâxeari valutarâ. Ama ari ş-un semnu că niscânti fonduri evropeani armân la BNR ş-nu suntu filisiti cușia tu icunumie. Constantin Rudniţchi: “Aestâ ânvârtușami fârâ acumtinari a rezervâllei internaţionalâ poati sâ scoatâ tu migdani ș-că ari unâ slabâ, s-dzâțemu, adrari a proiectilor di investiţii cu fonduri evropeani. Sâ zburaști cabaia că unâ parti ditu pâradzlli ți yin dit fonduri evropeani armân la Banca Naţionalâ ş-nu s-ducu tu icunumia dealihea, ama siyura că, ditu aestu punctu di videari, s-pari că lucârli ahurhescu s-minâ, avemu niscânti investiţii ți suntu dip decontati, nu-avem unâ cifrâ limbidâ, ama ditu ți videmu, fondurli ahurhescu s-hibâ hârgiuiti multu ayoñea ș-pi unu livelu mari.”
BNR dzâsi nica că IRCC, indițili di referinţâ ti creditili a consumatorlor, scâdzu la 5,90% pi anu, di la 5,97 di proțenti, livel scosu tu migdani aoa ș-trei meși. Easti prota scâdeari di simasie prima reducere importantâ din ultimul an. IRCC easti media aritmeticâ a ratilor di dobândâ di cathi dzuuâ dati ti tranzacțiili interbancari ditu trimestrul di ma ninti. Uidisitu cu spusa a experțâlor, indițili va s-cânoascâ ditu meslu alunaru daua scâdeari pânâ di 5,84%. Tendinţa easti limbidi discriscâtoari, iara evoluţia va s-ducâ la scâdearea a ratilor la creditili ipotecari contractati di aproapea 500.000 di româñi.
Aestu easti indițili dupâ care s-adarâ isapea a toclui ti creditili cu tocu variabil dat tu lei dupâ meslu mai ditu anlu 2019, anda avea valoarea di 2,36%. IRCC fu minduitu di Chivernisea a Românillei ca unâ culai ti contrabalansarea a efectilor a indițilui ROBOR, ți criștea avrapa di mesu-mesu câtâ bitisita a anlui 2018 și, unâ oarâ cu elu, ș-ratili a româñilor.
Tu ți mutreaști ROBOR la trei meși, dupâ cari s-adarâ isapea a pâhălui a creditilor di consum tu lei cu tocu variabil, aestu indiți scâdzu ș-el la 6,05 % pe an, di la 6,06 %.
Autor: Mihai Pelin
Apriduțearea: Mirela Sima Biolan