Deputaţlli plafoneadză păhălu la curentulu electric
Ari cabaia meşi, de cându conflictul Rusia – Ucraina escaladă, a deapoa Europa s’ampuliseaşti cu ună criză energetică fără precedentu. Păzarea ali energie electrică ditu România, cum majoritatea a păzărloru europeane, li dukescu efectele negative ale aliştei criză, di la consumatori la furnizori, distribuitori ică producători.
Daniela Budu, 24.11.2022, 12:12
Ari cabaia meşi, de cându conflictul Rusia – Ucraina escaladă, a deapoa Europa s’ampuliseaşti cu ună criză energetică fără precedentu. Păzarea ali energie electrică ditu România, cum majoritatea a păzărloru europeane, li dukescu efectele negative ale aliştei criză, di la consumatori la furnizori, distribuitori ică producători.
Tră s’li ayălisească efectili pi cari criștearea alarmantă a păhadzloru ali energie electrică lă aduţi a autoritățloru di București adoptară ma multi misuri ţi au scupolu s’veaglle participanțăllii vulnerabili, maxus mustiradzlli finali. Aţea ditu apofasi fu loată di Camera a Deputaţlor cari adoptă, ñiercuri, tru harea di for decizional, proiectul di alăxeari a actualăllei ordonanţă mutrinda energia.
Uidisitu cu actulu normativ, suntu ţănute plafoanele actuale tră populaţie di maxim 0,80 lei (16 eurocenți) tră un consum di până la 255 de kWh. Şcollurli, grădiniţele, creşele şi spitalele va s’hibă taxate cu un leu pi kWh (circa 20 de eurocenți), kiro tru cari nicukiratili cu un consum mare şi consumatorlli industriali cu 1,30 lei pi kWh (circa 26 de eurocenți). Tutunăoară, un muştiră nu va s’aibă consum plafonat că maş ti un singur loc di consum. Aesti plafoani va s’bagă tru lucru di la 1 di yinaru anlu yinitor până la 31 di marţu 2025.
Fură debutri apreasi şi contradictorii tru Camera Deputaților di București. Tuţ deputaţii spusiră că s’minduescu la români şi cum s’lă scadă cât ma multu facturile. Liberalii (la coguvernare) lugursescu că naua fturlie a ordonanţăllei de urgenţă easti hăirlătică tră consumatorllii casniţ şi industriali.
Florin Roman, deputat PNL: “Tru forma adoptată, atelli cari spusiră, adză, un vot contra va s’voteadză, ti paradigm, contra a nai ma scădzut păhă tră familiile monoparentale, şcoli, grădiniţe, creşe, spitale cari eara tru piriclliu s’hibă ncllisi.”
Proiectul di nom fu cabaia cutugursitu di parlamentarii USR, tru opoziţie, cari stipsescu actuala coaliţie la putere de sabotare a economiillei şi a sistemlui energetic. Deputatlu AUR Lucian Puşcaşu, tut ditu opoziţie, lugurseaşti că, pritu năile reglementări aprobate tru proiectul di nom, păzarea ali energie va s’hibă, diznău, bulversată, iar facturarea a consumlui de energie va s’hibă băgată tru lucru discreţionar.
Lucian Puşcaşu: “Guvernul reitereadză categorii sociale, profesionale ică ufilisinda alti criterii, a curi lă da, tru ună totală xiki di nămuzi, sumu turlia a niscăntoru dări di la stăpuiri, păhadz subvenţionaţ tră energie după criterii niantimilleati şi ufilisinda reguli complexe, zori ti băgari tru practico.”
Și la nivel europeanvăsiliili UE lucreadză deadunu tra s’află ună apandisi la problema păhadzlo mări și tra s’asoguripsească aprovizionarea cu energie a europeañilor. După ma mulţă meşi di dispute, Comisia Europeană pripusi un mecanism tră plafonarea a păhălui ti gazili naturale, materie primă ditu cari s’produţi şi curent electric. Aţeali 27 di state membre şi spusiră, ama, dezacordul andicra di pripunirea a Executivlui comunitar.
Autoru: Daniela Budu
Armânipsearea: Taşcu Lala
