NATO lipseaști s-armânâ unitâ
NATO lipseaști s-armânâ unitâ - easti mesajulu a secretarlui gheneral ali Suțâlli Nordu-Atlanticâ, Mark Rutte, anda s-facu alidzerli ditu Americâ
Tașcu Lala, 27.11.2024, 23:54
Suțâllia Nordu-Atlanticâ va s-lucreadzâ cu azvingâtorlu a alidzerloru americani, iți cari s-hibâ elu, ş-va s-adarâ tutu ți poati ta s-armânâ unitâ, tâxi, luni, secretarlu gheneral ali NATO, Mark Rutte. Elu feați declarația Berlin, iu s-adună cu canțelarlu ghirman Olaf Scholz.
„Noi va s-lucrămu cu Kamala Harris, va s-lucrămu cu Donald Trump ş-va nâ asiguripsimu că Suțâllia armâni unitâ, dzâsi olandezlu Mark Rutte, ți lo cumândârsearea a Suțâllei Nordu-Atlanticâ di la norvegianlu Jens Stoltenberg. „Nu am niți unâ șubei, ti ațea că easti sinferlu a nostu ş-ali Americâ”, adâvgă secretarlu gheneral ali NATO.
Nica di anda lo putearea, tu 1 di sumedru, Mark Rutte, ți fu ma ninti protu-ministru a Regatlui a Vâsiliiloru di Nghiosu chiro di 14 añi, dzâsi că nu adunâ gaile ti cum va s-bitiseascâ alidzerli americani. El dzâsi că âlli cânoaști multu ghini doilli candidaţ ş-că ari lucratâ cu Donald Trump chiro di 4 añi. Dupâ spusa a lui, America va s-armânâ misticatâ tu arada a Suțâllei Nordu-Atlanticâ.
„Ei ştiu că, maca Putin va s-anâchiseascâ tu Ucraina, Arusia va s-acațâ curai și va s-hibâ atumțea pi flancul a nostu ditu apiritâ ş-va s-hibâ unâ fuvirseari ndreptu ti NATOˮ, adâvgă Mark Rutte, ți cundille că aestâ easti furnia ti cari Washington-lu easti misticat tu Ucraina ș-tu NATO.
Di anda lo mandatlu, elu avu ma multi andamusi cu actorlli politiț, a curi themâ fu polimlu ditu Ucraina. Stâmâna ți tricu, secretarlu gheneral NATO, Mark Rutte ş-prezidenta ali Comisie, Ursula von der Leyen dzâsirâ, Bruxelles, că Suțâllia ş-Uniunea Evropeanâ va s-adarâ unâ parei operativâ ti ânvârtușarea a lucrului deadunu anamisa di dauli organizaţii. Doilli feațirâ tâmbihi că dizvârtearea di așchirladz nordu-coreeni tu Arusie easti unâ crișteari multu mari a polimlui ditu Ucraina, cata cumu ș-un piriclliu ti securitatea evropeanâ ş-irinea mondialâ.
Meslu ți tricu, Mark Rutte s-andâmusi cu minişțrâlii di Nafoarâ ditu vâsiliili soați. Secretarlu gheneral ali Suțâlli Nordu-Atlanticâ dzâsi, cu ațea furnie, că polimlu ditu Ucraina scoasi tu padi că s-asparsi ziga tu Evropa ș-aestu lucru va s-aducâ zñii tu tutâ lumea, ş-că vâsilii ți suntu la ñilli di kilometri, cata cumu China, Iran ică Coreea di Nordu, potu s-aspargâ securitatea evropeanâ.
„Lumea a noastâ easti ligatâ ș-tutu ași și securitateaˮ, cundille Mark Rutte. El dzâsi, tutnâoarâ, că soțlli tiñisescu tâxearea ta s-da, estanu, agiutorlu militar di 40 di miliardi di evradz ti Ucraina, iara țifrili aspunu hărgi di aproapea 21 di miliardi ti prota parti a anlui 2024. Partenerlli ditu zona a Pațificlui dzâsirâ că ș-elli va s-da, iara unâ paradigmâ easti Australia, ți va s-pitreacâ tancuri ti Kiev.
Di altâ parti, soțlli crescu investiţiili ş-nuntru, tu NATO, iara unâ ditu priorităţ easti apârarea aerianâ, ma multu tu arada a polimlui cu droni ți intrâ tu spaţiul NATO.
Autor: Leyla Cheamil
Apriduțearea: Mirela Sima-Biolan
