Planuri di europarlamentar
Alepţâ aoa şi ţinţi ani, la protlu euroscrutin cu partiţipari românească după apruchearea a vâsiliil’ei tru Uniuni, tru 2007, fu un bair di politicieni români tră cari nu s-avdzâ ici ţiva tru chirolu a mandatlui a lor. Aleapsirâ tra ş-l’ia tin’iili di cafi mes — cabaia mări, la standarde româneşti — fără s-adară ici ţiva şi s-iasă, idyealui discret, dit sţenă, unâoarâ cu bitisearea a mandatilor. Alidzerli di meslu aestu tră năulu Leghislativ comunitar chischinipsiră niheamâ reprezentanţâl’i ali Românie. Listili a partidilor importanti furâ dişcl’isi di inşi cari nu s-dusirâ geaba Bruxelles, iara alidzearea a lor diznău easti validarea nai cama cândisitoari ti lucurlu a lor politic. Aflaţ la doilu mandat, unâ parti dit eurodeputaţii român’i spun că va ş-ţânâ ma largu tru practico mărl’i scupadz. Aşi, caplu a listâl’ei social-democrati, Corina Creţu, tâxeaşti s-li vegl’e sinferurli a cetăţen’ilor român’i, ţintă a retoricâl’ei xenofobi a partidilor extremiste:
Bogdan Matei, 30.05.2014, 12:34
Alepţâ aoa şi ţinţi ani, la protlu euroscrutin cu partiţipari românească după apruchearea a vâsiliil’ei tru Uniuni, tru 2007, fu un bair di politicieni români tră cari nu s-avdzâ ici ţiva tru chirolu a mandatlui a lor. Aleapsirâ tra ş-l’ia tin’iili di cafi mes — cabaia mări, la standarde româneşti — fără s-adară ici ţiva şi s-iasă, idyealui discret, dit sţenă, unâoarâ cu bitisearea a mandatilor. Alidzerli di meslu aestu tră năulu Leghislativ comunitar chischinipsiră niheamâ reprezentanţâl’i ali Românie. Listili a partidilor importanti furâ dişcl’isi di inşi cari nu s-dusirâ geaba Bruxelles, iara alidzearea a lor diznău easti validarea nai cama cândisitoari ti lucurlu a lor politic. Aflaţ la doilu mandat, unâ parti dit eurodeputaţii român’i spun că va ş-ţânâ ma largu tru practico mărl’i scupadz. Aşi, caplu a listâl’ei social-democrati, Corina Creţu, tâxeaşti s-li vegl’e sinferurli a cetăţen’ilor român’i, ţintă a retoricâl’ei xenofobi a partidilor extremiste:
“Ti furn’ia că easti un contextu greu, cându aproapea 30% dit componenţa a Parlamentului European easti adrat dit forţi extremisti cari ş-adrarâ un scupo dit cetăţean’ili român’i, lucrătorlii român’i, România, lipseaşti s-viglem ndrepturli a aiştor.” Cu mirakea tră tematica a securitatil’ei continentale, libearala Norica Nicolai spuni că va s-armânâ membră ali Comisie di Apărare dit Parlamentul European, iu va s-andrupascâ ndridzearea a unâl’ei politicâ comunâ tru dumeni:
“Uniunea lipseasti s-acaţă tru isapi şansili ţi âl’i li da Tratatlu di Lisabona. Suntu dauă clauzi cari îl’i da izini ti unâ politică comună di apărari. S-vidzu cât crehtsa him dinintea la iţi piricl’iu. Tru unâ lumi globală, tru politiţ regionale, numata poţ s-bânedz maşi tini gol, ai ananghi di partiţiparea a tutulor, s-aduni stog axiili, s-adun’i irbâplâchili.” Europarlamentarlu UDMR Iuliu Winkler, membru a Gruplui Popular European, spuni că ari vrearea tră România tră unâ fortumâ politică idyealui cu aţea demograficâ şi teritorialâ:
“Spunem di multi ori că him şaptea vâsilii tru UE, ama nu him tru aestâ oarâ şaptea vâsilii tru aţea ţi mutreaşti influenţa icâ putearea tra s-amintăm sinferurli a vâsiliilei tru Parlamentul European şi instituţiili europene. Dimec, lipseasti s-nidzem ninti şi dit aestâ videalâ.” Afiliat tut PPE, Cristian Preda (Minarea Populară) va tra ş-ducâ ma largu lucurlu tru Comisia di Afaceri Externi a Parlamentului:
“An’i pripun câ tuţ scupadzli pi cari cetăţean’il’i român’i li avdzârâ di la mini tru campanie, dimec intrarea tru Schengen, intrarea tru zona euro, participarea ali Românie la procesul di anvartu;eari ali economie europeanâ s-hibâ bâgaţ tru practico.” Alepţâ diznău icâ debutanţâ, eurodeputaţl’ii român’i au borgea, spun comentatorlii, tra s-aibâ ngâtan ti cum lucreadzâ, ahtari turlie tra s-apandaseasca şi la aştiptărli a electoratlui dit vâsilie, şi a partidilor cari âl’i bâgarâ pi listi, ama şi a condiţiil’ei di legislator comunitar.
Armânipsearea: Taşcu lala
