Uniunea Ivropeanâ şi Flancul ditu Apiritâ
Prezidenta ali Comisii Ivropeanâ, Ursula von der Leyen, zburâ diznău, București, ti rollu strateghic ali Românii pi Flancul ditu Apiritâ ali NATO.
Tașcu Lala, 24.09.2025, 22:21
Prezidenta ali Comisii Ivropeanâ, Ursula von der Leyen, fu luni tu Românie, tu arada a unâllei voltâ ți şi pripusi ta s-andrupascâ UI ti vâsiliili membri ți au cândâseri di furñia a aprukearillei gheograficâ di Arusia i Belarus. S-andâmusi cu prezidentul Nicuşor Dan la Baza di Askeri di Mihail Kogâlniceanu ditu giudețlu Custanța, tu sudlu-apirita ali Românie. Mutrirâ Fregata „Vâsillelu Ferdinand”, Baza 57 Aerianâ Mihail Kogâlniceanu şi Portul di Askeri Custanța, scupo strateghicu ti securitatea reghionalâ. Moabețli furâ ti dimensiunea di askeri a politicâllei UI, dizvoltarea a industrillei ivropeanâ di armati şi ânvârtușearea a posturillei di apârari și nidari curai ti polimu.
Ursula von der Leyen ghinui misticarea ali Românii tu țâneara a siguranţâllei pi Flancul ditu Apiritâ. „Agiutaţ s-ţânemu Ivropa siyurâ pi calea a aerlui şi maritimâ la Amarea Lai. România ari hâiri ti securitatea ivropeanâ ş-easti unu soțu clleai pi Flancul ditu Apiritâ NATO”, dzâsi liderlu di Bruxelles. Ma multu, sâ zburâ ti ațea că Bucureștiul contracară mai multi tentativi di arâdeari și manipulari.
Ursula von der Leyen: „Tu meșlli ditu soni, România aspusi că ari rezilienţâ artimai ali dimocraţie ş-a instituţiilor a llei, țânu keptu la niscânti tentativi di arâdeari ş-di manipulari. Hiț ândrupâtori vârtoși, di pistusini ali Ucrainâ ș-ali Republicâ Moldova. Țâneț keptu la aspâreri, cari, di arada, fac parti ditu strateghia ali Moscovâ, iara aestu lucru fați ca rezilienţa a noastâ s-hibâ vârtoasâ. Şi ştim că avem ananghi ti criştearea a investiţiilor tu dumenea ali apârari. Ti aestâ, dăm tora unâ finanțari di ananghi.”
Ursula von der Leyen adusi aminti di paketa ti apârari aprukeatâ tu scarâ comunitarâ, di 800 di miliardi di ivradz pânâ tu 2030, easti unâ parti ditu aestâ pachetâ ditu programlu SAFE di 150 di miliardi di ivradz, la cari s-anyrâpsirâ 19 vâsilii, și România. Liderlu ivropean ghinui, di altâ parti, gairetea ali Românie ta sâ scadâ exikea bugetarâ.
Solidaritatea ivropeanâ easti di simasie tu aestu kiro greu, di zori, ți yini ditu partea ali Federaţie Aruseascâ, dzâsi, tu arada a lui, prezidentul Nicușor Dan. Adusi aminti că România va s-ankiseascâ ditu anlu 2027 trâdzearea di gazi ditu Amarea Lai, ațea ți va s-creascâ securitatea energheticâ ali vâsilie, ama ș-ali Ivropâ.
Nicuşor Dan: „Himu la Amarea Lai, cari easti di simasie ti Românie ş-ti Ivropa. Ahurhiindalui cu 2027, România va s-ankiseascâ s-tragâ gaz şi aesta va s-agiutâ la securitatea energheticâ ali Românie ş-ali Ivropâ. Nâ hârsimu că Uniunea Ivropeanâ apruke pripunirea ali Românie ti unâ strateghie ti Amarea Lai. Vremu ca hub-lu ivropean di securitati ditu aestâ strateghie s-hibâ localizat tu Românie, Custanța, la Amarea Lai.”
Tu arada a andamusillei, fu spusâ diznău simasia a rollui strateghic ali Românie ș-protlu hub loghisticu ti andruparea a gairețloru ti fâțeari mirimeti ali Ucrainâ viținâ.
Autor: Daniela Budu
Apriduțearea: Aurica Piha
