1.000 di dzăli cu polimlu ditu Ucraina
Dupu 1.000 di dzăli di polimu și avânda dininti ună iarnă greauă şi mplină di lucri ţi nu să ştie cum va s’ndreagă, Ucraina dimăndă că nu va s’tragă mănă dinintea ali Rusie.
Tașcu Lala, 20.11.2024, 19:59
Reprezentanţălli a multiloru stati, politicieañi şi diplomat pitricură hăbări că ndrupăscu, tora dupu 1.000 di dzăli di anda nkisi aputruseara arusească tru Ucraina, iarapoi liderlli a instituțiilor europene zburără ti giunamea şi curayilu a Kievlui. Parlamentul European tăxeaşti ali Ucraină că Uniunea va u agiută ahătu kiro cătu va s’hibă ananghi ta s’amintă ună irini cu ndriptati. Leghislativlu comunitar ndreapsi, Bruxelles, ună andamasi di lucru plenară la cari loară parti pritu videoconferinţă şi prezidentulu Volodimir Zelenski.
Liderlu di Kiev spusi că ma s’nu avea agiutoru europeanu, Ucraina vrea s’agiundzea sumu aputrusearea ali Rusie. Haristusi a bloclui comunitaru tră agiutorlu a lui, cari feaţi di căuli ta s’ţănă keptu dinintea ali Moscovă. Căftă a lumillei s’da ună apandisi vărtoasă dinintea a năiloru fuvirseri al Vladimir Putin, după ţi prezidentulu rus deadi cali ti alăxearea a doctrinăllei militară a văsiliillei, cari pruveadi tora ună apandisi nucleară cara va s’facă ună atacă cu armati convenţionali, ma s’hibă di easti ndrupătă di ună puteari nucleară. Pritu alăxearea a doctrinăllei nucleară, lugurseaşti liderlu di Kiev, prezidentulu rus va ta să spună că nu ari naeti tră irini şi că va tra s’u-aspargă Ucraina şi lumea tută.
Și Forţăli Armati ali Ucraină dimăndară ună hăbari ti populu ucrainean, tru cari aduc aminti că, tamamu dupu 1.000 di dzăli, askerea naţională „veaglle casa europeană, căsăbadzlli, fumellili, soţlli şi yinitorlu a cilimeañiloru a noştri dinintea ali fuvirseari tu scară alargă ali Federaţie Rusă”. Tut cu furñia că s’umplură 1000 di dzăli di polimu, tru idyiulu kiro, Bruxelles s’ţănu ună andamasi a miniştrilor europeañi ali Apărari, iu eara călisitu şi secretarlu-gheneralu al NATO, Mark Rutte. Ufiţialli zburără ti agiutorlu militar tră Ucraina, cu itia a hăbarillei faptă di SUA, pritu cari deadiră cali a Kievlui ta s’ufilisească armamentulu durusitu ta s’agudească locări strateghiţi di năuntrulu ali Rusie.
Ditu ahurhita-a polimului, statili europeani agiutară Ucraina cu 130 di miliardi di ivradz, ditu cari 45 di miliardi easti agiutoru militar. Până tora, 67.000 di askirladz ucraineni fură nviţat cu antrenamentu tru Uniunea Europeană. Di altă parti, ta s’ndrupască Kievlu, dupu ună ñillie di dzăli di polimu tru Ucraina, casili a protiloru instituţii europeani – Comisia, Consiliul şi Parlamentulu – fură ndreapti cu videlliuri luni dicseară tru hromili galbină şi ñirlă, hromili a hlamburăllei ucraineană.
Și Bucureşti, Pălatea a Parlamentului fu ndreaptă tu videlliuri cu hromili galbină şi ñirlă, a deapoa, hlambura a cratlui viţinu fu anălţată tu intrata a aţea nai cama marea ali instituţie. Ucraina armâni niazvimtă, după 1.000 di dzăli di polimu lăhtărosu, spusi, tru ună hăbari pitricută pritu Radio România, ambasadoarea a Statilor Unite di Bucureşti, Kathleen Kavalec. Ea cundille că, uidisitu cu ONU, isapea a atacăllei arusească tru Ucraina easti di 11.000 di ţivilli, şi cama di 600 di cilimeañi.
Ambasadoarea adăvgă că Moscova ma largu faţi crimi di polimu lăhtăroasi, nica şi cu trăñipsearea a ţivilliloru şi a prizonierloru di polimu, iarapoi topili aruseşti asparsiră sculii, spitali şi monumenti ali istorie, a culturăllei şi identitatillei ucraineană. Tru hăbari, ufiţialu haristusi a Bucureștiului că ndrupaşti Kievlu şi adusi aminti că scupolu a polimului năstreaţi cabaia sinurli ali Ucraina, a deapoa ti paradigămă suntu spusi inţidentili fapti tru teritoriulu ali Românie
Autoru: Daniela Budu
Armănipsearea: Taşcu Lala
