Catastisea ali Uniuni Ivropeanâ
Prezidenta ali Comisie Ivropeanâ zburaști ti unâ Uniuni ți s-hibâ axi sâ-și aleagâ mira, unâ mirâ cama mari ş-cama vârtoasâ.
Tașcu Lala, 06.10.2025, 15:51
Ivropa lipseaști s-alumtâ ti loclu a llei tu unâ lumi iu mirăkilili a oamiñiloru suntu filisiti fârâ ñilâ ca armi, dzâsi ñiercuri, Strasbourg, prezidenta ali Comisie Ivropeanâ, Ursula von der Leyen, tu prota a llei cuvendâ ți mutreaști catastisea ali Uniuni di cara fu aleaptâ diznău pi aestâ thesi. ”Lumea di adzâ easti fâr-di ñilâ. Nu putem s-nu acâțămu tu isapi zorea ți u ved cathi dzuuâ țetățeañilli ditu UI, cari dukescu criştearea a pâhadzloru ş-adunâ gaile ti ți va s-facâ ma-nclo. Aesta lipseaști s-hibâ oara ti independenţa ali Uniuni Ivropeanâ, anda lipseaști s-apufisimu tu ți turlie di suțietati ş-dimucrație vremu s-bânămu”, cundille Ursula von der Leyen tu plenlu a Parlamentului Ivropean.
Ea lâ gri a vâsiliiloru membri ta s-hibâ deadunu, cundillindalui că easti di simasie s-hibâ Ivropa libirâ sâ-și aleagâ suțatili. Ti polimlu ditu Ucraina, Ursula von der Leyen dzâsi că Arusia lipseaști s-pâlteascâ pâradz ti zñiili ți li adră, di cara Moscova ankisi aestâ ceamaunâ. Şefa a CI câftă nauâ andrupari ti Ucraina, a că Ivropa âlli deadi pânâ tora a Kievlui anvârliga di 170 di miliardi di ivradz agiutor di askeri şi finanțiar.
Von der Leyen zburâ ș-di unâ moabeti cama zori te-a zburari ş-deadi hâbarea că, deadunu cu Ucraina ş-alțâ soț, va s-adarâ unâ adunari ali Suțâlli internaţionalâ ti turnarea a ficiurițloru ucraineni. Ea zburâ ș-di catastisea a vâsiliiloru membri ți suntu tu partea di apiritâ, ți li vizită di pțânu kiro și cari au ș-ali zñie di la ceamaua ditu Ucraina. Tu minduita ali prezidentâ a CI, partea ditu apiritâ ali Ivropâ afireaști tutâ Ivropa, di la Amarea Balticâ la Amarea Lai, iara aesta easti furnia ti cari Uniunea lipseaști s-investeascâ tu andruparea a llei pritu Eastern Flank Watch.
Analtul ufițial ali Uniuni deadi tu șteari că la alantu Consiliu Ivropeanu va s-aspunâ unâ carti pritu cari s-veadâ unu planu salami ti ankisearea di năi proiecti kino tu dumenea ali apârari, apufisearea di scupadz limbidz ti 2030 ş-adrarea a unlui semestru ivropeanu ti apârari. Independenţa ali Uniuni tu unâ lumi aplinâ di ghideri fu hirlu aroșu ditu cuvenda ali Ursulâ von der Leyen.
”Anda zburâmu di independenţâ, zburâmu di alidzearea a mirâllei a noastâ. Ti aestu lucru alumtâ Ucraina ş-aesta easti ațea ți lipseaști s-u aibâ tu minti tuț ivropeañilli, di cara Ivropa easti unâ idei – idei di libirtati ş-cuveti deadunu. Aesta fu ideea ți lu avu tu minti totna bârnul di dupâ 1989, anda Apirita ș-Ascâpitata s-feațirâ unâ, idee ți easti ș-tora multu vârtoasâ”, luyurseaști şefa ali Comisie.
Aesta easti furnia, dzâsi Ursula von der Leyen, ti cari aduțemu cama aproapea di Uniunea a noastâ alti stati membri – pritu investiţii, pritu andruparea a reformilor, prin bâgarea pi unâ pâzari unicâ. “Unâ Uniuni ma mari ş-ma vârtoasâ asiguripseaști securitatea ti noi tuţ. Ti ațea că yinitorlu ali Ucrainâ, ali Moldovâ, a vâsiliiloru ditu Balcañilli ditu Ascâitatâ easti tu Uniunea a noastâ”, lâ dzâsi nica Ursula von der Leyen a membrilor a Parlamentului Ivropeanu.
Autor: Ștefan Stoica
Apriduțearea: Mirela Biolan
