“Dzuua-a Ascultătorlui” 2020 la Radio România Internaţional
Vruț soț, dumânică, tu 1 di brumaru 2020, tamamu ti dzuua-a Radioului românescu, vă aştiptămu la «Dzuua-a Ascultâtorlui» la Radio România Internaţional.
Eugen Cojocariu, 08.10.2020, 07:33
Vruț soț, dumânică, tu 1 di brumaru 2020, tamamu ti dzuua-a Radioului românescu, vă aştiptămu la «Dzuua-a Ascultâtorlui» la Radio România Internaţional.
Anlu 2020 fu un anu acutotalui ahoryea, ditu videala urutâ a zborlui, trâ tutâ lumea. Bana-a tutâloru fu mintitâ di pandemia di COVID-19. Meatrili/ apofasili restrictivi ți li loarâ autorităţli, ama şi bânaticlu cu dușmanlu ți nu s’veadi, nâ alâxirâ ditu thimealji arâdzli/ adețli di cathi dzuuâ. Alargu-shiderea unu-alantu, purtarea-a prusupidâllei, meatrili di igienă fapti urminie di autorităţ, cursurli online, teli-lucârlu suntu ațeali hâlãț tu huzmetea-a noastâ di cathi dzuuâ.
Nclliși n’casi, tru kirolu di carantinâ, di nu avea cali ta s’nâ videmu cu soțlli și soia, di nu aveamu câbilea ta s’inșimu la restaurantu i ta s’nidzemu la un spectacolu, di nu aveamu câbilea ta s’urdinãmu tu xeani, avum şi avem ananghi di hâbãri alithea. Ti amârtie, pandemia adusi şi unâ explozie a hâbãrloru arâdoaciki, a dizinformărlor, a hâbãrloru di mari vazi/ senzaţionali, a hâbãrloru niverificati, arcati tru spaţiul public cu i fârâ naeti, maxusu pritu șingirili suțiali.
Tru ediţia 2020 a «Dzuuâllei a Ascultătorlui» la RRI vă ntribãmu ditu ți izvuri vâ loaț hâbãrli ti pandemie, cum aprâftâsiț s’alidzeț hâbãrli ți suntu cadealihea di hâbârli ți arâdu. Cari easti rolu a radioului public tru kiro di pandemie ? Cari easti rolu a unlui postu di radio internaţional tru aeastu kiro di ințertitudini suțialâ prilundzitâ?
Aştiptămu cu sinferu apandisili a dumnilliloru a voasti tra s’li acâțãmu tu isapea-a programiloru RRI ditu 1 di brumaru 2020!
Eali pot s’hibâ pitricuti pritu e-mail, la ro@rri.ro icâ serviciul.roman.rri@gmail.com, pi Facebook icâ ndreptu/ ndreptu ca un comentariu la articolu di pi site-ul RRI, www.rri.ro.
Ma s’aveț miraki puteţ s’pitrițeț apandisi audio pri-nreghistrati pe WhatsApp, la +40744312650, icâ puteţ s’nâ pitriteț numirlu a dumnilliloru a voasti di telifonu şi va vă asunãmu ditu studio ti pri-nreghistrarea audio a mesajlui a dumnilliloru a voastri.
Vâ Haristusimu!
Autoru: Eugen Cojocariu
Armânipsearea: Tașcu Lala
