Hăbări ditu bana românească şi internaţională
COVID-19. Cama di 8.800 di noi infecții cu Covid fură raportate marț tru România, diplu andicra di dzua precedintă, cum și 43 di dicese asociate. 415 pacienți sunt la terapie intensivă. Incidența cazurilor easti tru creaștere tru ma multe locuri, inclusiv tru capitala București, cari s’aproaki di 3 la 1.000 di locuitori. Di la ahurhita a lansarilli vaccinului la bitisita a meslui andreu 2020, aproapea 7,9 milioane di oameni faţiră vaccinlu Covid. Tru tută văsilia sunt identificate facilități tra s’aproaki centrele di evaluare tru ambulatoriu, programate s’agiungă operaționale tru aestă săptămână. Experțălli fac timbihi că easti important ca oamiñilli s’apăndăsească la protili seamne di infecție și s’llia misuri ună ş’ună acasă.
Newsroom, 11.01.2022, 22:51
Sassoli. Prezidentulu Klaus Iohannis pitricu marță ună carti di purguruseri tra moartea prezidentului a Parlamentului European David Sassoli, spunânda că aestu ditu soni fu unu bunu soţu ali România și un lider cari alumtă tra valorile și principiile europene. Social-democratul italian David Sassoli tricu tu alantă etă luni seară tru căsăbălu italian Aviano, iu fu internat tu 26 di andreu dupu niscănti complicații greali ligate di sistemlu imunitar. Sassoli, fostu jurnalistu, fu număsit prezidentu a Parlamentului European tru alunaru 2019. Eara tu bitisita a mandatlui, iara marțea yinitoare Parlamentul European lipseaşti ta s’voteadză succesorlu a lui. Easti tra prima oară tru istoria a Parlamentului European cându un prezidentu muri tru kirolu a mandatlui. Prim-viţeprezidentulu Roberta Metsola, un conservator ditu Malta cari lipsea ta s’hibă aleptu ca succesor al Sassoli stămâna yinitoare, va s;lucreadză ca interimar.
SUA-Rusia. Statele Unite și Rusia s’akicăsiră s’ducă ma largu dialoglu, cari, uidisitu a presăllei europene, poati s’hibă amintaticlu golu a muabeloru di 8 săhăţ purtate luni Geneva, Elveția. Șeflu a delegațiillei SUA, secretarlu adjunct di stat Wendy Sherman, nu apruke căftarea ali Rusie di garanții că NATO nu va s’tindă cama cătă apirită. “Nu va s’dămu izini a vărnui să u surpă politica NATO a ușilor dişcllisi, cari daima fu una tu amprotusa tra Alianța NATO. Și nu va s’lomu apofasi ti Ucraina fără Ucraina, ti Europa fără Europa i ti NATO fără NATO”, spusi Sherman. Diplomatlu american năpoi spusi tu andamasea cu omologul a lui rus că aputrusearea ali Ucraină nsimneadză hărgi babageani tra Moscova. Viceministrul rus di externe Serghei Ryabkov tăxi nica nă oară că Rusia nu ari naetea ta s’calcă Ucraina, ama cundille că riscul a unui conflict nu lipseaşti s’hibă alăsatu nanăparti. Dupu muabeţli di Geneva va s’tănă săptămâna aesta alti muabeţ anamisa di Rusia-NATO tru Bruxelles și ună andamasi ali OSCE tra să zburască ti Ucraina, la Viena.
Andrupari. Guvernul a Româniillei va llia năi misuri di la 1 apriliu tra s’u veaglle populația di efectele a creastirillei hărgili la energiei, dclară premierul Nicolae Ciucă după andamusea cu membrilli a cabinetlui a lui. El spusi că guvernul ari tu videală năi scheme di agiutoru tra ntreprinderle ñiţ şi di mesi. Consumatorlli privaț cari ufilisesc până la 300 kW/va s’hărsească di ună nauă schemă di protecție, cu ună reducere di 5% a TVA-ului și compensații tra născănti costuri. S’ari tu videală și ună schemă di agiutoru tra consumlu di gaze naturale. Agricultura și industria alimentară va s’hărsească di născănti misuri di agiutoru ahurhinda cu 1 şcurtu, tru vigoare până la 1 alunaru. Premierlu spusi că aesti misuri va s’hibă prezentate tru prima andamasi a coalițiillei di guvernământu.
Autoru: Udălu a hăbărlor
Armânipsearia: Taşcu Lala
