Securitatea a flancului dit apirita al NATO
Roxana Vasile, 14.03.2018, 12:45
Easti ananghi ti coopeararea tra anvârtusearea a flancului dit apiritâ a Alianţãlei Nord-Atlantiti. Cu aestâ câftari nchisirâ moeabetli Bucureşti anamisa di miniştrili ali Apărari dit 9 stati ti ma ninti eara comunisti, ufitialităţ ali NATO şi reprezentanţa a Departamentului american ali Apărari. România, tru parteneriat cu Polonia, easti motorlu a aistei “Iniţiativi B9”, dit cari nica fac parti Vargaria, Cehia, Estonia, Letonia, Lituania, Slovacia şi Ungaria. Reprezentanţâli a lor ş-pripusirâ s-ndreagâ un baiur di cal’iuri directoari nintea a summitlui aliat di Bruxelles, dit meslu alunar.
Tru aesta noima, ministrul român ali Apărari, Mihai Fifor, declara:
“Ază prezenţa aliată avansată easti bagata tru prcatico pi tut flancul dit apirita ali Alianţa, em tru nord-est, arealu baltic, em tru sud-estu, pi teritoriul naţional şi la Amarea Lae. Ma largu avem tru amprotusa aestu lucru dimec ti bagarea tru practico şi, tru aesta noima, aştiptăm tru alunar apofasi di mari simasie, yilipsitoari tra catastisea di apărari şi aliatl’i s-tal’e curayilu.”
Acţiun’ile ali Rusie baga zori a tutaloru membriloru NATO tu flancul dit apirita, ama şi Alianţa tru ansamblul a l’ei, s-aibă ngatan maxus ti sistemlu comun di apărare. Lişor nu easti, ti furn’ia că, tru dzalili a noastri, una criză di securitati cafta em halat convenţionali, em niconvenţionali di turlie hibrida ica provocări asimetriti. Em, anamisa di ceareili ti li au tru mana si tra cari s-cundil’e maxus Bucureşti s-aradapseasca ahardzearea a 2% dit Produslu Internu Brut tra dumenea ali Apărari, lucru ti România alu fati nica di anlu ti tricu, tu idyiul chiro, deadun si cu cristearea a infrastructurlor naţionale, atea turlie ca mobilitatea a ascheriloru şi ali tehni militara aliata s-hiba ma hairlatică.
Easti ananghi tutunaoara, ti modernizarea a ascheriloru naţionale, prin ancupararea di echipamentu performantu. Deapoa, tru arada a unei andamusi a ufitialităţlor, viniti Bucureşti, cu prezidentul ali României, Klaus Iohannis, nu fu alasata nanapartui niti simasia a prezenţal’ei SUA pi flancul dit apirita si aesta s-yilipseasti pritu angajamentulu susto andicra di stabilitatea a reghiunil’ei, cum şi ananghea ti cristeari a singirlui transatlantic cu scupolu ti asiguripsearea a securitatil’ei tru tuta Alianţa.
Caplu a statlui român napoi spusi, tutunaoara, ca easti ananghi ti cristearea a lucarlui deadun anamisa di NATO şi Uniunea Europeană, cundil’indalui că gaeretli ti anvartusearea, a rolui ali Uniunii tru dumenea ali apărari lipseasti s-dizvarteasca deadun cu Alianţa Nord-Atlantică. Ase, nu va s-agiunga pi daua şi va s-poata s-faca gaeret di catra dauli parta tru dumenii di sinfer. Prit boatea a ministrului ali Apărari, Mihai Fifor, România sa spusi etima tra s-aproachi un comandamentu militar al NATO pi nivel di trup di ascheri, deadun cu ateali daua comandamenti ti suntu, pi lucru, Craiova (sud), pi nivel di brigadă şi Bucureşti, di divizie. Aofasea va u l’ia Alianţa tru meslu alunar, Bruxelles.
Autor: Roxana Vasile
Armânipsearea: Tascu Lala
