Suţata a partidilor di la puteari
Bogdan Matei, 10.01.2014, 13:34
România di dupu comunismu nu ari adetea a suţatilor politiţi cari s-hibâ ghini încl’igati. Vârtoasi tu opoziţii, tuti alianţili, suţatili, cartelurli ahurhescu sâ s-slâgheascâ unâoarâ ţi agiungu la cumândiseari şi s-aspargu nâinti di bitisearea a mandatlui. Orgoliili a liderilor, interisili ayoriea a partidilor, doctrinili ayoriea şi alumta ti guvernari — tuti aesti duc la dispârţarea a lor. Aşi fu, tu an’ii 90, cu Convenţia dimocratâ, ama şi tu proţl’ii an’i 2000, cu Alianţa Driptati şi Aver. Niţi Uniunea Soţial-Liberalâ nu da seamni di sănâtati. PSD şi PNL adrarâ suţatâ câ ţe canâ di ei nu lu-aproachi pi prezidentul Traian Băsescu.
Agiunsirâ la puteari tu primvearea a anlui 2012 şi furâ bâgaţ di electorat dinâintea a plebicistului – tu inşita a idyului an, cându acâţarâ 70% dit mandatili di parlamentar. Tu tiurii, soţial-democraţl’ii şi liberalii va s-cumândiseascţ deadun pânâ tu 2016, ama, dupu maşi un an, Uniunea ahurhi s-distramâ niham câti niham. Tu vâsâlii, PSD minduiaşti că ari achicâseri pi ascumta întrâ PNL şi PDL. La ţentru, soţial-democraţl’ii îi aduc câbati a liderlui liberal, Crin Antonescu, că easti tu unâ ligâtura cama bunâ cu prezidentul Băsescu. Avdzândalor di minduierli a partenerilor, liberalii hâbârisirâ câ vor unâ completari a protocolui USL, ta s-adarâ cama buni liguturli dit suţata di guvernari. Crin Antonescu: Inşita a anlui alâsă unâ impresii generalâ di disputâ, di încâceri şi easti borgea a noastrâ s-îndridzem şi s-limpidzâm ţi lipseaşti. Voi cu tutâ inima şi minduiescu că s-poati s-nidzem ninti.”
Purtătorlu di cuvendâ al PSD, Cătălin Ivan, apruchie ideea, spunândalui că, dupu alâxearea a protocolui, aestu lipseaşti s-hibâ cama bun ti partidlu a lui: Raportul dintrâ protili partidi dit USL easti 2 la 1. Mutrinda aestâ proporţii, şi tu teritoriu şi tu parlamentu şi tu sondaji, pistipsescu că, da, putem s-zburâm iara di documentili di înhiinţari ali USL.” Nai ma mulţâ dintrâ ei sceptici mutrinda bana al USL, analişţâl’ii minduiescu că, iţi lucru va s-facâ mutrinda moaubetea andicra protoclu, dauli partidi nu va s-acaţâ deadun inşita. Tu Mai, la europarlamentari, va s-aibâ listi ayoriea, iar tu Brumar, la alidzerli prezidenţiali, cu tuti că Antonescu easti candidatlu ofiţial al Uniuni, tutâ lumea pistipseaşti că protlu a lui concurentu va s-hibâ caplu al PSD, premierlu Victor Ponta.
Apriduţearea: Cristina Mina
