Agiutoru tră Ripublica Moldova
SUA și Marea Britanie potu sagiută Rep. Moldova cu armamentu, ma shibă di saspardzi catandisea ditu Transnistria, reghiune separatistă rusofonă ditu apirita alustui stat.
Leyla Cheamil, 23.05.2022, 18:17
Un stat cabaia multu zñiipsitu di agresiunea militară rusă contra ali Ucraină easti Republica Moldova, viţină cu România și Ucraina. Di ună parte, sinurlu ali Republică Moldova, unu di nai ma oarfăni state europene, cu ună populație di aproapea trei milioane di bănători, fu tricută di sute di ñilli di arifugaţ ucraineni. Mulță ditu aești ş-află apanghiu aclo, tu kirolu a polimlui. Ţru idyiulu kiro, autoritățli di Chișinău spunu că aproximativ 70% ditu exportul pe amare a văsiliillei easti zñiipsitu di polimlu ditu Ucraina, iara, pritu porturile româneşti, Republica Moldova exportă maximum 23% ditu produsili a llei. Tu cadrul a născăntoru antrivideri care s’ţănură Iaşi, prezidentulu a Comisiillei di Agricultură ditu Parlamentul di Chişinău, Vladimir Bolea, căftă a utorităţlor române alăxearea ali legislaţie şi dişcllidiarea a născăntoru puncte di yimbruki comune anamisa di aţeali dauă state. “Lucrul aestu s’faţi maş di itia că ari niscănti keadiţi administrative şi zburămu di yimbrukili moldo-române, care suntu ñiţ, nu suntu dizvoltate, evoluate şi, ma multu di ahât, noi avem un numir multu ñicu di apunţă. Yimbrukili armasiră asparti, abordările sunt orlea zorlea inadmisibile ti 2022 şi cadialihea că noi vrem aprukearea să s’facă pritu practicăˮ, diclară Vladimir Bolea. Diputatlu di la Chişinău nica cundille că Uniunea Europeană nică nu ş-dişcllisi porţăle, acutotalui, ti produsele ditu Republica Moldova.
Di altă parte, crescu asparizmili că ari căbilea ta s’tindă conflictul ruso-ucrainean tru regiunea separatistă rusofonă ditu estul a ripublicăllei, Transnistria, după un şingiru di incidinte preşcavi cu autor nicunuscut. Statili Unite ali Americă sunt etimi s’da armamentu a Ripublicăllei Moldova, ma s’aibă aestă căftari, tru aesta noima, ditu partea a Chişinăului. Diclaraţiile fură fapti di ună parei di congresmeni americani aflaţ tru ună vizită di lucru tru aestă republică. Oficialii americani dimăndară că votară ună pachetă di agiutoru ti Kiev și Chișinău tru valoare di 40 di miliardi di dolari, hiinda zborlu di asistenţă umanitară şi militară. Tora ma ninti, secretarul di stat ti afaceri externe şi Commonwealth al Regatului Unit ali Mari Britanii şi Irlandăllei di Nord, Liz Truss, diclară că Moldova lipseaşti s’hibă echipată simfunu cu standardulu NATO, tra s’u agiută să s’veaglle contra a fuvirsearillei invazia arusă. Truss cundille că s’ţănu muabeţ, tra s’hibă sigura că apărarea Ripublicăllei Moldova poati s’talle curayilu ti iţi yinitoru atac. Cara planurile a oficialului britanic sunt adoptate, membri di la NATO asiguripsescu armament modirnu, alăxinda echipamentul ditu epoca sovietică, şi va instruiască askirladzlli cum să-lu ufilisească. Aesti diclaraţii fură fapti după ti lidirul aşi-dzăsilor autorităţ di la Tiraspol, Vadim Krasnoselski, spunea căţe goala cearei a problemăllei transnistreană easti pricunuştearea indipendinţăllei regiunillei separatistă.
Autoru: Leyla Cheamil
Armânipsearea: Taşcu Lala
