Cooperarea lărdzită România – Polonia
București și Varșovia apufusiră diversificarea a cooperarillei bilatearală.
Leyla Cheamil, 29.03.2023, 13:56
România și Polonia apufusiră s’lărdzească cooperarea bilaterală tu ma multi planuri. Marță, premierul Poloniei, Mateusz Morawiecki, feaţi ună vizită la București, iu fu aştiptat di șeful a statului, Klaus Iohannis și avu andamasi cu omologlu a lui, Nicolae Ciucă și cu ministrul Apărarillei, Angel Tîlvăr.
“Cilăstăsimu ca legăturile noastre strease pi linie di securitate şi apărare s’hibă diplo pritu ună cooperare economică vărtoasă şi hăirlătică, pritu potentialu ti lu-au aţeali dauă economiiˮ, spusi prezidentulu Iohannis, după andamasea cu premierul di la Varșovia. Şeful statlui adăvgă că Polonia easti unul ditu nai ma importanţi parteneri comerciali ali României ditu regiune, di adusi aminti că, tru anul 2022, alăxerli comerciale bilatearale agoumsiră pi un nivel record di aproapea 11 miliardi di euro.
Tu arada a lui, premierul Nicolae Ciucă spusi că andamasea comună di marță a Guvernelor român şi polonez adusi furñia a aţiloru dauă părţă ti s’confirma planul di acţiune 2022 – 2026 ti cari s’akicăsiră tu andamasili di ma ninti. Ase, fură apufusiti obiective şi direcţii năi di lucru tru plan bilateral pi liniile a cathi unlui minister ahoryea, tru domenii catacum cercetare, digitalizare, IMM-uri, evoluţie demografică, tineret şi sport, apărare şi transporturi.
Prim-ministrul di București spusi că domeniul cercetării, dizvoltării şi digitalizării easti multu important, iara dauli văsilii au un potenţial ahoryea şi cilăstăseri deadunu ta s’află aţeali cearei pritu cari s’asiguripsească anvărtuşearea şi dizvoltarea aluştuiu. El nica spusi că ari cilăstăseri comune tru aţea ţi mutreaşti aflareea ceaei ti duţearea ma largu digitalizarea, tru hăirlăticlu emu a cetăţenilor, emu a ntreprinderilor ñiţ şi di mesi.
Tutunăoară, premierul Ciucă spusi că fură analizate şi oportunităţile tră continuarea a dizvultarillei infrastructurăllei, amu aţillei rutiere, emu pi calea di heru şi portuară. Aestu cundille relevanța aliştei infrastructuri număsită Via Carpathia şi, tutunăoară, Rail-2-Sea, hiinda zborlu ti conectarea a dauă porturi – Portul românesc Constanţa di la Amarea Lae şi Portul polonez Gdansk di la Amarea Baltică.
“Suntu elemente cari avem căndăsearea că va s’agiută nu maş a craturloru a noastre, România şi Polonia, am ava s’agiută şi ali Slovacia, şi Ungaria, şi tru sud, cătră Bulgaria, di va u facă ligătura anamisa di partea di sud a Europăllri şi, tutunăoară, suntu elemente di infrastructură cari valli-agiută şi Ucrainaˮ, cundille prim-ministrul Ciucă. El spusi şi ti muabeţli “multu buneˮ ţi lu avură tu domeniul apărarillei şi la apofasea tra s’adară ună comisii tehnice mutrinda industria di apărare pi thimellilu a angajamentelor asumate, anlu tricut, la Varşovia.
Tu arada a lui, premierul Poloniei, Mateusz Morawiecki, spusi ca hiinda multu bună colaborarea comună, iaraa creştirile economiţi ditu aţeali dauă craturi feaţiră că “boţli ali Varşoviei şi Bucureştiului si s’avdă ma ghini tru Europa şi tru tută lumeaˮ.
Autoru: Leyla Cheamil
Armânipsearea: Taşcu Lala
