Cum ș-tricurâ româñilli vacanța di Paști
Româñilli ș-tricurâ sârbâtorli di Paști em tu vâsilii, em tu xeani.
Tașcu Lala, 10.05.2024, 23:32
Tu 2024, Paștili fu yiurtusitu tu Românie tu idyea stâmânâ cu dzuua di 1 di Mai, ași că româñilli avurâ unâ vacanțâ di ndauâ dzâli. Mulțâ di elli s-dusirâ tu stațiuñili montani di pi Valea a Prahovâllei. Chirolu fu bun, iara mulțâ turișțâ vrurâ sâ șeadâ nafoarâ, la terasi, anda alțâ vrurâ ta s-llea vimtu și s-priimnă tu munti. Unlu di nai cama vizitatili obiectivi turistiți fu Castelul Peleș ditu Sinaia, adratu la cumandul a protlui vâsille ali Românie, Carol I.
Dipu mulțâ româñi tricurâ Paștili mardzina di Amarea Lai, iu s-hârsirâ di un chiro ti mirachi, measi festivi și zaiafeț cu muzicâ live. Ei puturâ s-priimnâ cu barca alargu pi amari și s-mutreascâ cu mirachi câsâbălu Custanța di ndzeanâ, ditu roata panoramicâ dit portu ți s-dișcllisi diznău. Oamiñilli cama alipidaț adrarâ ș-prota scaldâ tu amari, a că apa fu arați. Maca tu stațiunea Vama Veche, turișțâlli șidzurâ pi arinâ și s-hârsirâ di atmosfera/hâvaia boemâ, tu sonu di chitarâ, tu Costinești ș-Mamaia ei s-dusirâ la festivaluri di muzicâ, iu nai ma buñilli DJ mixarâ dzuuâ ș-noapti, fârâ acumtin.
Și Bucovina ș-Maramureșul furâ pritu nai ma câftatili reghiuni ditu Românie. Turișțâlli viniți ditu vâsilii ș-ditu xeani s-hârsirâ di mânâstirli ditu nai, di adeț, ama ș-di mâcari. Oaspițlli furâ hâidipsiț di nicuchiri cu mâcări tradiționali multu nostimi. Turișțâlli s-hârsirâ ș-di priimnări nafoarâ, tu fisi, di peisaji/aynanghiu, ama nai ma multu di isihie. Niscânțâ româñi vrurâ ta s-ducâ tu Delta ali Dunâ, iu chirolu bunu âlli agiută s-hârseascâ nica ma multu și s-exploreadzâ aestâ zonâ unicâ tu Evropa, ți easti tricutâ tu patrimoniul UNESCO. Turişțâlli puturâ s-agiungâ cu barca aproapea tu tuti cohili a rezervaţillei, tamam ș-pi canali, iara ațelli ți s-diștiptarâ di tahina s-dusirâ ș-la pescuit.
Ațelli ți șidzurâ acasâ s-hârsirâ di un chiro ti mirachi ș-inșirâ s-priimnâ pritu parcuri deadun cu taifa și soțlli. Dupâ unâ masâ di Paşti multu avutâ şi, vahi, ș-ândauâ excesi culinari, terasili şi restaurantili âlli chirnisirâ oamiñilli cu mize. Vârâ 25.000 di poliţișțâ, giandarñi, poliţişțâ di la sinur, pompieri ş-oamiñi di la alti structuri furâ bâgaț pi lucru, tu vacanţa ți s-feați la yiurtusearea a Paştilui ortodoxu, ta s-hibâ duñeaua tu siguranţâ. Ei furâ la evenimentili publiți ta s-hibâ siyuri că nu va s-facâ vârâ lâiațâ di itia a câlâbâlâchillei, ama ș-ta s-âlli agiutâ cetâţeñilli, ma s-hibâ ananghi.
Dupâ spusa a MAI, pareili ți au angâtanu s-nu patâ vârâ țiva ș-ți s-himusescu s-lucreadzâ tu catastisili di piricllu, furâ aproapea di ațeali cama di 12 ñilli di locări di ancllinari la Dumnidzău, ama nu s-feați niți unâ lâiațâ.
Niscânțâ româñi aleapsirâ ti minivacanţâ destinațiili ditu xeani, nai ma câftati furâ Vâryâria, tu aradâ all inclusive, cu masa tradiţionalâ di Paşti, ș-Gârția. Feriboturile ți s-dusirâ câtâ Thassos, unâ ditu nai ma câftatili destinații, furâ amplini di româñi, ți furâ multu hârsiț di vacanța ditu nisiili gârțeșțâ.
Autor: Mihai Pelin
Apriduțearea: Mirela Sima Biolan
