Dzuua NATO tu Românie
România easti unâ cu axiili dimucratiți ali Suțatâ Nordu-Atlanticâ, dzâsi prezidentul Klaus Iohannis, cu furñia a yiurtusearillei a Dzuuâllei NATO tu vâsilie.
Tașcu Lala, 28.04.2024, 15:25
Tu prota dumânicâ a meslui apriiru easti yiurtusitâ, tu Românie, Dzuua NATO, anda easti adusâ aminti apruchearea a vâsillei la Suțata Nordu-Atlanticâ. Estanu s-ancllisirâ 20 añi di-anda România fați parti ditu aestâ structurâ și 75 di añi di anda fu thimillusitâ aestâ suțatâ, nai ma vârtoasa alianţâ politico-militarâ ditu isturie, ți s-feați pi axiili a dimucraţillei, a libirtatillei individualâ şi a statlui di ndreptu, ași cumu dzâsi șeflu a statlui, Klaus Iohannis.
Tu unu mesaj pitricutu cu aestâ furñie, prezidentul dzâsi că vâsilia easti unâ cu axiili dimucratiți ali Alianțâ Nordu-Atlanticâ ş-lucreadzâ cu mintimineațâ la livellu a aliațloru, ca unu dealihea sturu di securitati şi stabilitati tu reghiunea ali Amarea Lai, ama ş-pi partea ditu apiritâ. „Avândalui unâ ligâturâ transatlanticâ vârtoasâ ş-unâ suțatâ salami anamisa di tuti statili membri, NATO s-alâxi dipriunâ, tu aeșțâ añi, anda s-alâxea ș-catastisea ditu mediul di securitati internaţionalâ și ș-feați ma vârtoasâ relevanţa strateghicâ şi-și asiguripsi totna securitatea tu zona euroatlanticâˮ, cundille Klaus Iohannis.
Tu arada a lui, premierlu Marcel Ciolacu dzâsi că România ş-feați ma vârtoasâ, tu aeșțâ 20 añi di la aprucheari, profilul di aliat irbapi, ți lucreadzâ activ ti scutearea tu migdani a axiiloru ş-a prințipiilor dimucratiți, a securitatillei ş-a stabilitatillei tu spaţiul euroatlantic ş-nafoara a lui. Uidisitu cu spusa a premierlui, că easti dipu tu viținata a conflictului ditu Ucraina, România s-hârseaști, ca stat membru NATO, „di nai ma marea garanţie di securitati ți u avu vârâoarâˮ.
Ministrul a Apârarillei Naţionalâ, Angel Tîlvăr, cundillei că tu ațelli 20 añi di cându fu aprucheatâ la Alianța Nordu-Atlanticâ, România scoasi tu padi că nu easti maș unu cratu ți s-hârseaști di securitati, ama ș-da siguranţâ şi stabilitati.
„România easti unlu ditu proțlli factori di securitati ditu partea di apiritâ. Tu aestu chiro mintitu angreacâ multu s-avemu angâtanu di securitatea ș-rezilienţa a noasti. Easti ananghi s-dămu tu padi că putemu s-u scutemu-n capu dupâ tuti fuvirserli ți nâ si facu tu ți mutreaști securitatea şi stabilitatea a noastâ. Lucrulu a cathiunlui statu membru angreacâ ş-ași nâ asiguripsimu că NATO armâni unâ organizaţie vârtoasâ și salami, un promotor a securitatillei ş-a stabilitatillei tu tutu spaţiul euroatlatic. Evoluția a Românillei tu NATO nu putea ta s-facâ fârâ Așcherea a Românillei ş-a oamiñloru a llei di besâˮ.
Ministrul Angel Tîlvăr adusi unu semnu di tiñie a eroilor ți câdzurâ anda ș-adra borgea tu teatrili di operaţiuni şi și-aspusi tiñia ti așchirladzlli agudiț tu acţiunili di alumtâ, ti veterañilli ditu teatrili di operaţini, cata cumu ș-ti personalul a Ministerlui a Apărarillei Naţionalâ, ți loarâ parti la evoluţia a vâsilillei tu arada a Suțatâllei.
Autor: Leyla Cheamil
Apriduțearea: Aurica Piha
