Hăbări ditu bana românească şi internaţională
Israelu hãbãrisi cã ascumbuseaşti alţã 60.000 di rezerviști ma mulţã andicra di aţelli 300.000 cari eara cllimaţ cama ninti. Forțe cabaia mãri şi echipamenti greali furã ardãpsiti tu sinurlu di tu Cumata Gaza. 100 di oamiñi acãţaţ di Hamas cându lu-ari..
Newsroom, 10.10.2023, 22:49
VIZITĂ – Prezidentulu Klaus Iohannis va s’nkiseascã ñiercuri vizită tu Ungarie, cãlisitu di omologlu a lui maghiaru Katalin Novák, aestã hiindalui prota vizitã ufiţialã tru Budapesta ţi u faţi unu prezidentu românu tru 14-lli añi ditu soni. Uidisitu cu spusa ali Administrație Prezidențialã, vizita s’faţi tu contextul a unãllei dinamicã criscutã a ligãturloru tu livelu analtu, dupu vizita ufiţialã ţi u feaţi prezidentulu Katalin Novák, București tru yismãciuni 2022 și cu furñia cã avea loatã parti la 8-lu Summit a Inițiativãllei Trei Amări, nicukiru hiinda România tru yismãciuni 2023. Caplu a statlui nãpoi lu spuni sinferlu şi dişcllidearea ali Românie ti lucãrlu deadunu hãirlãticu, pragmaticu și transparentu cu Ungaria. Aţelli doi prezidinţã va u facã isapi catastisea di adzã tu livelu reghionalu, europeanu și globalu, tru contextulu a polimlui di fuvirseari ţi-lu-faţi Arusia contra ali Ucrainã.
EXERCIȚIU – Cama di 400 di militari llia parti tu Steadfast Jupiter 2023, nai cama lãrguriu exercițiu NATO asistatu di computeru, disvãrtitu tu Tsentrulu Comunu di Antrenamentu Getica” di Tsincu, nolgica ali Românie. Llia parti askirladz di tu 17 stati aliati și cama di 20 sumunităț di tu pareia di cumandu și forți NATO. Exercițiulu ari tu amprotusa unã abordari di 360 di gradi a securitatillei și apărarillei colectivã ali Alianțã Nordu-Atlanticã. Uidisitu cu spusa a Ministerlui ali Apărari, exercițiul ari tu scãpo s’anvãrtuşeadzã adunarea stogu și interopearabilitatea-a forțãlor armate ascumbusiti și easti hopa di bitisitã ti certificari a Comandamentului Truplui Multinațional di Notu-Datã ditu România, axizitu s’asiguripseasã cumandulu şi controlu a opearațiuñilor terestri ali NATO pi livelu reghionalu, tu iţi catandisi.
UCRAINA – Prezidentulu ali Ucrainã, Volodymyr Zelenskyy, feaţi marțã unã vizită ufiţialã tru România. Dupu andamsi, prezidentulu Zelensky haristusi ali Românie ti ndruparea ali Ucrainã tru nai ma greulu sticu di oarã ditu istoria a llei. Mjuabeţli cu prezidentulu Klaus Iohannis avurã tu amprotusa securitatea la Amarea Lae, cuupiararea bilatearală, integrarea ali Ucrainã tru UE și euro-atlantică, cata cum și tiñisearea acutotalui/ pãnu di mardzinã/tu capu a ndrepturlor ti inşilli ţi ţãnu di minoritățli naționale. Tu arada-a lui, Iohannis lu-asiguripsi omologlu a lui ucrainean ti apofasea ali Românie tra s’ndrupascã ma largu vãsilia viţinã, ahãtu kiro cãtu va s’hibã ananghi, până la eliberarea-a teritoriului… Zelenskyy avu muabeţ şi cu premierlu român Marcel Ciolacu, prezidentulu a Senatlui, Nicolae Ciucă, și prezidentulu interimaru tu Camera a Deputaţloru, Alfred Simonis.
ISRAEL — Israelu hãbãrisi cã ascumbuseaşti alţã 60.000 di rezerviști ma mulţã andicra di aţelli 300.000 cari eara cllimaţ cama ninti. Forțe cabaia mãri şi echipamenti greali furã ardãpsiti tu sinurlu di tu Cumata Gaza. 100 di oamiñi acãţaţ di Hamas cându lu-ari atacatã Israelu suntu țãnuti ostatiţi, a deapoa organizația teroristă fuvirsi cã va s’ahurheascã sã-lli vatãmã ma s’hibã cã ma multi ţinti ţivili, va s’hibã bombardate. Isapea-apolimlui anamisa di Israel și pareia teroristă Hamas nãstricu ndauã ñilli di morțã și pliguiţ, tru dauli părțã. Aghențiile umanitari ali ONU feaţirã timbihi ti consecințili greali şi ti consecinţili greali di itia-a Israelui ţi va s’nkiseascã unu asediu total tu Cumata ca apanjdasi ti ataca nkisitã di Hamas. Aghenția ONU tră Cilimeañi easti gãilipsitu ti restricția di apă și alimenti tru Gaza. Tutunãoarã, aghențiile ONU cutugursirã vãtãmarea aisraelieañiloru di pareili armãtusiti paestinieani și lã cãftã s’ãlli siligheascã ustatiţlli.
Autoru: Udãlu a Hãbãrloru
Armânipsearea: Taşcu Lala
