Ma mulță militari americani tru România

SUA dimăndă că va-lli ţănă nai ma pţănu nica nauă meşi, askirladzlli americani dizvărtiţ la baza Mihail Kogălniceanu ditu sud-estul ali Românie.

Daniela Budu, 23.01.2023, 14:29

Pentagonul va s’ţănă ñilli di askirladz ti nai ma pţănu nica nauă meşi la baza Mihail Kogălniceanu ditu România, dizvărteari militară americană aflată nai ma aproapea di conflictul ditu Ucraina, dimăndară oficiali alepţă di The New York Times. Uidisitu cu publicația americană, până tora nu eara limbidu desi SUA va u ţănă unitatea la baza ditu sud-estul ali Românie ică va ş-mută askerili tru altu locu. La aestă bază suntu staţionaţ, ahurhinda ditu veara tricută, aproapea 4.000 di militari ditu Divizia 101 Aeropurtată a SUA, inclusiv ñiţ parei di trupe cari facu frecventu exerciţii la sinurlu cu Ucraina.

Trupele va s’fugă ditu România tru yinitorlli doi meşi iara uidisitu cu ofiţialli alepţă di The New York Times, va s’hibă alăxiti di ună brigadă diferită a idyillei divizii, cumăndusită di ofiţeri superiori şi di strategi militari di nivelu analtu. Pitriţearea a aluştoru aproapea a unei zonă di conflict da izini, spun analiștilli militari, loarea ma ntrăoară a apofasiloru tră poziţionarea a askeriloru şi armilor, cara Rusia va lu pingă polimlu tru teritoriul NATO, ditu cari România faţi parti. Ună ahtari minari poati s’asiguripsească că Statele Unite suntu ghini poziţionate ti ună descurajari vărtoasă şi a unei poziţii defensive a aliaţlor a noştri pi continentul european, spunea și Pentagonlu tru ună declaraţie faptă sâmbătă, adăvgânda că SUA ma largu va u ajusteadză postura, ca apandisi la mediul di securitate dinamic.

Tru aestu kiro, ahurhinda cu 15 di yinaru, pisti ună sută di askirladz americani s’instruiescu deadunu cu infanteriştilli ditu cadrul a Batalionlui 300 Infanterie Mecanizată “Sâmtul Andrei” ditu Galaţi. Uidisitu cu MApN di București, scupolu ali instruiri easti tra s’ahăndusească şi s’perfecţioneadză tehniţli, tactiţli şi proţedurli di lucru, anviţarea a caracteristiţloru şi a capacitatillei di alumtă generată di echipamentili militare ditu dotari, cum şi creastirea a nivelui de interopearabilitate tru simfunie cu căftărli NATO.

Ndauă ñilli di militari xeñi, suntu, tru aestu kiro, tru România, după ţi tru cadrul summitului NATO di la Madrid ditu veară s-apufusi anvărtuşearea a Flancului Estic, iara numirlu a lor easti tru dinamică. NBai ma mulță suntu ditu Statele Unite și ditu Franța, cantonaț la Baza Militară Mihai Kogălniceanu. Tut aoa eara, pritu rotație, militari canadieni, britaniţ și italieni, tru misiuni di Poliție Aeriană. Tru premieră, tru România s-constitui și prota parei di alumtă sumu cumandul NATO, cumăndusitu di francezi, la Cincu, tru nolgica ali văsilie. Tutunăoară, suti di askirladz francezi și olandezi viniră, până tora, pritu rotație tru România. Iara Brigada Multinațională di Craiova fu anvărtuşită di militari polonezi și portughezi. Nilli militari americani și xeñi suntu și tru Polonia, tut tra s’anvărtuşeadză poziția Alianțăllei Nord-Atlantiţi dinintea agesiunillei ali Rusie contra ali Ucraină.

Autoru: Daniela Budu

Armânipsearea: Taşcu Lala