Misuri tră băgarea tru practico a sancțiunilor internaționale

Companiile ditu România aflate sum incidenţa a sancţiunilor băgati ti Rusia pot sducă ma largu lucurlu, ama viglleati di Stat.

Roxana Vasile, 10.06.2022, 16:29

Impactul tră economia naţională a sancţiunilor internaționale băgati a companiilor controlate di entităț ruseşti di itia a conflictului ditu Ucraina nu lipseaşti s’hibă alăsatu nanăparti. Protecţia a lucrtorloru români ditu aesti companii easti ună prioritate tră Guvernul a Româniillei – diclară, gioi, tru un comunicat, ministrul a Economiillei di la București, Florin Spătaru. România lipseaşti să s’adapteadză şi s’llia misuri cât cama ntrăoară, tra s’nu agiungă la crizi şingiru — nica spusi ministrul. Reacția a lui yine tru contextul tru cari Executivul adoptă ună ordonanță di urgență, prit cari companiile ditu România controlate di entităţ rusești vizati di sancţiuni va s’poată să-şi facă lucurlu ma largu fără conturi blocate, ama maş car ava s’intră sum un sistemu di viglleari a Statlui. Scupolu easti diplo: băgarea garanţii cari s’asiguripsească că regimul di sancţiuni ali Uniunii Europene nu easti zñiipsitu, ună ş-ună cu protejarea a firmilor și a păzarillei aucurlui românescu.

Cama salami, ună companie ditu România ţi easti sum sancţiuni va s’pitreacă ună căftari a Ministerlui a Economiillei, cari va s’verifică cara aesta tiñiseaşti condiţiile di funcționare. Cara căftarea easti aprobată, atumţea easti aleptu un reprezentantu ditu cadrul a Ministerlui cari va s’aibă harea di vigllitoru permanentu, iara fondurile şi resursele economiţi ale companie va s’hibă diblocate. Tru aestu kiro, vigllitorlu va s’poată s’lliaa parti, tru harea di observator, la andamasili di lucru a Adunarillei Generală a Acţionarilor, asociaţilor, Consiliului di administraţie şi alti andamasi di lucru mutrinda managementul a companiillei; va s’aibă acces tru tuti locaţiile tru cari ş-dizvărtescu activitatea, cum şi la tute documentele aprukeati di persoana juridică. Vugllitorlu va s’informeadză, tutunăoară, Ministerul cându va s’aibă şubei mutrinda nitiñisearea a sancţiunilor. Cara aesti şubei s’confirmă, atumţea ali companie va-lli si llia ndreptul tra s’hibă pi lucru şi easti, diznou, bagă ti restricții.

Ordonanţa guvernamentală di urgenţă fu adoptată tru idyea dzuuă tru cari reprezentanțălli a aţiloru aproapea 2.600 di lucrători a societatillei TMK-ARTROM ditu Slatina și Reșița, producătoare di ţevi laminate, cu acţionariat rusesc, s-dusiră București tra s’mută caplu dinintea a sediului Executivului. Elli eara niifharistusiţ ligati di amănărli mutrinda amănărli ti păltearea a tiñiiloru di cathi mesu şi avea frixea că pot tra ş-keară lucurli di lucru. Tora, pot s’adille haristusiţ! Idyea cu elli, tuţ româñilli cari lucreadză tru companii iu rușllii au acțiuni. Uidisitu cu ministrului Florin Spătaru, tru industria metalurgică suntu nai cama multi ahtări companii, tru cari suntu tru lucru aproapea 22.000 di persoane, iara tru industria auto s’estimeadză că pot s’hibă zñiipsiti 5.000 di locuri di lucru, ditu aproapea 200.000.

Autoru: Roxana Vasile

Armânipsearea: Taşcu Lala