NATO lu-apridună curayilu ali Rusie
NATO ş-anvărtuşeadză arădărikea ditu apirită.
Roxana Vasile, 17.03.2022, 18:17
Tru kirolu anda askerea arusă u duţi ninti aputrusearea tru Ucraina, Bruxelles, miniştrilli ali Apărari ditu NATO apufusiră s’anvărtuşeadză Alianţa pi lungu kiro, maxusu tu arădărikea ditu apirită, s’clleamă ș-tru România. Nkisita a unăllei ahtari apofasi eara scoasă tu videală di secretarlu gheneral a Alianțăllei, Jens Stoltenberg: volea ali Rusie ta s’ufilisească furteaţa lipseaşti s’hibă acăţată tu isapi şi nu lipseaşti s’agărşimu că aestă văsilie u-ari ş-topa nucleară.
Ghini ma — exighisi agiutătorlu a lui, românlu Mircea Geoană – aestu nău purtaticu a Alianţăllei nu easti semnulu a unlui conflict iminentu cu Federația Arusă, neise ari rolea ta s’talli curayilu. Naua ascumbuseari militară a NATO tru Apirită lu spuni numirlu babageanu criscutu di askeri terestri di reacţie rapidă, cu echipamentili aferenti, ma multi forţi tru aeru, ună apărari antiaeriană şi antibalistică anvărtuşită, portavioani, submarini şi un numiru ma mari di pampori di alumtă. Va s’hibă anvărtuşită, tutunăoară, apărarea cibernetică.
Tru Alianţă ari unitati tru ţi mutreaşti apofasea ta s’nu pitreacă, tru Ucraina, forţi ică avioani cari s’bagă tu practico ună zonă di interdicţie aeriană. NATO mindueaşti s’nu s’agiungă, aestă turlie, tu catastisea că polimlu nkisitu di Vladimir Putin să s’tindă anamisa di dauă blocuri nucleare. Alliumtrea, miniştrilli ali Apărari apufusiră s’agiută, ma largu guvernul di Kiev financiaru, umanitaru şi militaru, ași cum u feaţiră ș-până tora, aţea ti deadi izini tră rezistenţa ucraineană. Tu ţi mutreaşti curmarea iţido naeti ali Moscovă ta s’lu tindă polimlu anaparti di sinurli ali Ucraină, gruplu di alumtă al NATO ditu România va s’hibă acutotalui operaţional tru şcurtu kiro.
Tru ţi mutreaşti dimensiuñili ică eventualu statutu permanentu a năilor grupuri di alumtă ditu Apirită, secretarlu gheneralu agiutătoru al NATO, Mircea Geoană, cundille că apofaea finală va s’hibă loată la summitlu aliatu ditu cirişaru. Până atumţea, maca tută catandisea di securitati ditu Europa s’alăxi, membrilli a Alianțăllei fură căndăsiţ s’inveastească nai ma pţănu 2% ditu Produslu Internu Brutu tru Apărari. România, cari ari ahărdzită di mulţă añi aestu proţentu tu planu militaru, apufusi, tora ayoñea, s’lu crească la 2,5%.
Neise, cu unu zboru, NATO nu anticipeadză ună atacă ali Rusie contra a teritoriului Alianţăllei, maxusu că 75% ditu forţăli aruseşti suntu concentrati tru Ucraina, fără rezultati hăirlătiţi. Ghini ma, secretarlu gheneralu Jens Stoltenberg feaţi timbihi, diznău, că Alianţa nu va u străxească dotu vără atacă contra a unlui stat membru și feaţi nica nă oară cllimari a prezidentului Putin s’dănăsească ună ş-ună polimlu şi s’nkisească muabeţli diplomatiţi cu bună vreari. Disproporţia babageană anamisa di forţăli NATO şi aţeali aruseşti easti tru favoarea aliaţlor, a deapoa, aesta u dukeaşti şi Moscova — să spusi Bruxelles.
Autor: Roxana Vasile
Armânipsearia: Taşcu Lala
