Aşi dzâc, ore fârtate!
Vâ câlisim s-ascultaţ aoa unâ pârvulie de-al Nicolae Batzaria, “Aşi dzăc, ore fârtate!”, tu interpretarea al Toma Enache.
Tașcu Lala, 04.04.2026, 08:55
Dauâ cârvăńi cu untulemnu
Un arâu vor ca sâ-şi treacâ;
Şi easte mare, nu-are punte
Ş-ca l’i frică s-nu s-neacă.
Ma năinte trec mulărle-
Ştiu di-anoată pisti apă.
– “Aide, Ghesă! Aide, Murgă!”
Tot lă strigă pănă ascapă.
Ia-l’i-ia tora şi cârvănarl’i,
Ş-fac nă cruţe, cum s-agiută.
Pân atumţea el’i tu bană
Multe ape avea tricută.
– “Stâ-Mârie!” faţe unlu,
“Va s-ţ-aprindu patru ţeri
Patru dzăli tot pi-aradă,
S-mi ascăpariş, s-nu mi cheri!”
Iar alantu ş-dzăţi singur:
– “Nâ bărnuti nu tâxescu.”
Poate s-trec, vahi fără, zore;
Nu-am tră ţi s-mi hârgiuescu”.
Intră dol’i tot ma nuntru.
S-faţe apa mare, mare;
Creaşte, creaşte tot ma multu,
L’i-acâţă pân la pâltare.
Tel ţi nu vru ta s-tâxească
S-faţe gione, da ta s-treacă.
Apa l-pindze, lu-arâstoarnă:
S-duse omlu, vrea si s-neacă.
– “Dumidzale!” Strigă năslu,
Avdză ş-tine Stâ-Mărie!
Ascâpaţ-me şi-untulemnu
Va s-vâ dau ună furtie!”
– “Bre chirute”, l’i-u-are soţlu,
“Ma pi-agalea, mult ti tindză:
Minduia-te, că furtia
Ţinţi lire poţ si-u vindză”.
– “Aşi dzăc, ore fârtate,
S-ascâparim maş di-aţia,
Nu hiu glar eu; necă drame
Nu şi-u veade Stâ-Mâria.”
