Raportul ali Comisie Europeanâ mutrindalui România
Comisia Europeanâ easti di câbuli cu progresili ali Românie tu proțedura di exichi bugetarâ multu mari, ama fați tâmbihi că nica ari aspârdzeri di zigâ.
Tașcu Lala, 05.07.2026, 23:44
Comisia Europeanâ luyurseaști că România, deadun cu alti optu vâsilii, lo misuri hâirlâtiți ti andridzearea a exichillei bugetarâ para mari. Bruxelles-ul apruche pacheta di primuvearâ a semestrului european 2026 şi mindueaști că tuti vâsiliili ți eara tu zori ș-tiñisirâ cu dichi borgili.
Uidisit cu spusa a Executivlui European, România easti pi unâ cali bunâ di scâdeari a aspârdzerilor di zigâ, ama nu tricu nica di hopa nai ma greaua, iara yinitorlu țâni di duțearea ma largu a misurilor ş-a reformilor. România ari nica nai ma marea exichi bugetarâ dit Uniuni, a că u scâdzu cu 1,4 puncti tu un an, di la 9,3%, iara ti 2026 aesta va sâ scadâ la 6,2%. Easti tutnâoarâ singura vâsilie cu aspârdzeri di zigâ macroicunumiți para mări ş-ari nai ma scâdzutlu grad di colectari a TVA-lui, a impozitlui pi profit i a impozitarillei a pâradzlor ți âlli llia persoanili fiziți. PNRR-ul easti luyursit di thimelliu, iara aoa nu zburâm mași di fondurli adusi şi di investiţiili adrati, ama ș-di amintaticlu ti un chiro lungu ți yini dit reformi.
Un punctu di simasie easti reforma a pensiilor ş-a salariilor, ama şi controlul a hărgilor publiți, di arada. Di cama multili ori, Comisia nu mutreaști aestu raportu dit punctu di videari politic, ama, ti Românie, dzâți că instabilitatea politicâ arucâ ințertitudini pi calea pi cari imnâ vâsilia. Piriclliul nai ma marli easti andridzearea fiscalâ s-aibâ zñnie – di cara ițido chivernisi ți va s-yinâ lipseaști s-țânâ politițli di echilibrari.
Raportul ali Comisie ari şi unâ parti ți mutreaști mași dumenea suțialâ dit Românie – di cara resursa umanâ easti di simasie ti criştearea icunumicâ, iara, tu soni, unâ crişteari icunumicâ sânâtoasâ lipseaști s-veadâ tu tutâ suțietatea, iara ași cum easti catastisea icunumicâ şi fiscalâ, aşi easti şi ațea suțialâ. Tu chirolu anda media ali Uniuni aspuni unâ ratâ a piriclliului di urfânipseari şi di dari nanâpârti dit punctu di videari suțial di 21%, România easti dipriunâ la cama di 32%, unâ dit cama mărli dit Uniuni. Hâirea a transferurlor suțiali armâni scâzutâ. Anda tu Uniuni, agiutoarili suțiali scad piriclliul di urfânipseari cu vârâ 33%, tu Românie impactul easti sum 20%. Comisia dzâți limbid că sistemlu di afireari suțialâ va mutreari diznău, di cara nu afireaști duri oamiñilli vulnerabile, maxus tu zonili di la hoarâ, iu bâneadzâ cama di 45% dit româñi.
Și educaţia armâni un punctu critic. România ari unâ dit cama mărli rati di analfabetismu funcţional dit Uniuni: cama di 40% dit elevi nu au competenţili minimi la dghivâseari şi matematicâ, andicra di cum easti di arada tu Uniunea Europeanâ, di vârâ 25%.
Tu ți mutreaști infrastructura socialâ şi di mediu, România easti diznău tu pareia a vâsiliilor cu decalaji mări. Aproapea un cuartu dit nicuchirati nu sunt conectati la reţeli moderni di apâ şi canalizari, iara investiţiili tu infrastructurâ s-feațirâ mași tu ndauâ reghiuni. Comisia cundilliadzâ că România lipseaști sâ-și ayuñiseascâ investiţiili tu infrastructura di mediu ş-tu servițiili publiți di thimelliu, ta sâ scadâ dyeafureili teritoriali.
Autor: Mihai Pelin
Apriduțearea: Mirela Biolan
