FITS 2026, tu bitisitâ
Festivallu Internațional di Teatru di Sibiu agiumsi tu bitisitâ.
Tașcu Lala, 07.07.2026, 23:30
Unlu di cama di simasie evenimenti culturali dit Europa, Festivallu Internațional di Teatru di Sibiu și-ancllisi, duminicâ, 28 di cirișar, porțâli. Festivallu s-dizvârti tu chirolu 19-28 di cirișar, ș-avu anvârliga di 850 di evenimenti cu vârâ 5000 di artișțâ dit cama di 80 di vâsilii. Tema a edițillei di estan – SUFLIT – ți cundilleadzâ că ma ndzeanâ di tehnologhie șadi suflitlu, a că easti zborlu di suflitlu a artistului ică a spectatorlui.
Ași cum dzâsi prezidentul a festivallui, Constantin Chiriac, actor și directorlu gheneral a Teatrului Naţional „Radu Stanca” di Sibiu, ediţia cu numirlu 33 aleapsi aestâ temâ ta sâ scoatâ tu migdani ți va s-dzâcâ dealihea creaţia, emoţia şi ligâtura cu publiclu, cari easti şi un slogan, furnia a noastâ ta s-bânăm.
Chiro di dzați dzâli, ațea ți fu capitalâ culturalâ tu 2007 apânghisi spectacoli di teatru, reprezentații nafoarâ, tu aerâ, muzicâ, gioc, numiri di circu, instalații vizuali, conferinți, expoziții, scuteri tu padi di cărțâ, atelieri, proiecții di filmu, moabeț culturali. Tunâoarâ, s-dizvârtirâ spectacoli tu locuri anvârliga di Sibiu. Nai ma multili evenimenti culturali s-feațirâ tu spaţii niconvenţionali ş-nafoarâ.
Oaspitâ tu un dialog cu scriitorlu Marius Chivu, ambasadoarea Simona Miculescu, reprezentantu permanent ali Românie la UNESCO, dzâsi că Festivallu Internaţional di Teatru di Sibiu easti „unâ paradigmâ di diplomaţie culturalâˮ, filisit ca unâ urnechi la multi andamusi internaţionali. Ea cundille că, prit anamea și fana internaţionalâ, aestu evenimentu scoati tu padi imaghinea ali Românie tu lumi.
Institutlu Cultural Român andrupâ loarea parti a niscântor producţii româneşțâ di simasie bâgati tu programlu a festivallui, agiutândalui la scutearea tu migdani a excelenţâllei artisticâ. Prit spectacolili andrupâti suntu „Colibriˮ, tu regia al Florin Piersic Jr., şi „Pescul balonˮ, tu regia al Theo Herghelegiu, dauli suntu producţii a Teatrului di Artâ Bucureşti, „Don Quijoteˮ, tu regia al Alexandru Dabija, producţii a Teatrului ACT, „Ivanovˮ, tu regia al Eugen Jebeleanu, producţii a Teatrului Naţional „Marin Sorescuˮ di Craiova, „Sebastianˮ, tu regia al Matei Lucaci Grunberg, producţii a Teatrului ˮMaria Filottiˮ di Brăila, cata cum şi „Savanta conspiraţieˮ, tu regia al Marius Oltean, producţii ali Suțatâ ti Teatru Liviu Rebreanu.
Semnu di pricunușteari a lucurlui a lor la fanuminlu festival, Sucachea a oamiñilor cu anami di Sibiu easti ma avutâ cu optu numi mări a artilor a spectacolului dit tutâ lumea: Fanny Ardant, Cristian Măcelaru, Yamamoto Noh Theater, Wim Vandekeybus, Emma Dante, Elfriedi Jelinek, Margareta Niculescu, Ofelia Popii.
Autor: Leyla Cheamil
Apriduțearea: Mirela Biolan
