BNR creaști prognoza di inflație
BNR da tu șteari că inflaţia scadi cușia, ama amânâ scâdearea a toclui di politicâ monetarâ ti anlu ți va s-yinâ.
Tașcu Lala, 01.09.2026, 12:19
Tu proțl’i trei meși aluștui doilu an, inflaţia tu Românie – easti nai ma marea, ași, dit Uniunea Evropeanâ – ți u bâgă ti scumperea a energhil’ei, a naftil’ei, a gazilor, ama ș-a niscântor materii primi cata cum ângrâşâmintul, aluminiul şi polietilena. Niachicâsearea ș-ceamauna dit Orientul di Mesi adusi zn’ii multu mări a pâhadzlor ți criscurâ la naftâ. Tu alunar, ama, s-alâxi niheamâ situația. Scâderea ali inflaţie fu vârtoasâ, ma multu că s-deadirâ nanâparti zn’iili ândrepti ti liberalizarea acutotalui i a pâzaril’ei a energhil’ei electricâ.
Stâmâna aesta, Institutul Național di Statisticâ deadi tu șteari unâ inflație di 8,16% tu meslu alunar, di la 10,42% tu cirișar, aesta hiindalui prota scâdeari ma mari ti aeșțâ 12 meși dit soni. Guvernatorlu BNR, Mugur Isărescu, dzâți că scâdearea lipseaști s-ducâ ninti ș-tu agustu. Bași ași, instituția ți u cumândâseaști mutri diznău tu crişteari, la 6,1%, inflaţia tu sonea a anlui 2026 ş-dzâți că va s-agiungâ la 3,4% anlu ți yini, tutnâoarâ lucârli ași s-ved tora.
Câbati di dânâseara a scâdearil’ei suntu xerea, câroarea și zn’iili, ți li adusi producţia di electrițitati n’icâ şi pâhadzl’i mări ali energhie, ti aestu lcuru ți s-feați tu chirolu dit soni. La aestea s-adavgâ, dupâ cum dzâți guvernatorlu Isărescu, niachicâserli gheopolitiți, lundzearea a crizâl’ei energheticâ şi duțearea ninti fragmentarâ a emburlâchil’ei internaţionalâ.
În economie, câftarea di nuntru easti ma scâdzutâ, hargea privatâ scâdzu dupâ putearea di ancupârari, ți scâdzu ș-ea, și tocurli scâdzuti di la popul ș-a pistusinil’ei scâdzutâ a consumatorilor. Al’iumtrea, creditarea a companiilor criscu cu vârâ 20%, iara investiţiili crescu, ama pre-ayalea. Va s-dzâcâ slâghearea a câftaril’ei agiutâ inflaţia, ama aduți zn’ie ti cristearea economicâ.
Guvernatorul BNR nu s-aşteaptâ la unâ turnari-ntroarâ a aliștei şi luyurseaști di thimel’iu luarea di fonduri europeani. Tu idyiul chiro, exichea comerțialâ scâdzu, iara industria şi exporturli armân cu zn’ii di câftarea slabâ di pi pâzărli europeani. BNR dzâți că moneda naționalâ – leulu – ari, tora, un cursu flexibil, ama misticarea a Bancâl’ei Chentralâi pi pâzarea valutarâ fu multu ma n’icâ di an. Tutnâoarâ, guvernatorlu Mugur Isărescu, cundil’eadzâ că toclu cl’eai nu va s-hibâ scâdzut ninti ca inflaţia sâ scadâ sum aesta.
Tu soni, tu ți mutreaști trițearea la evro, România nu umpli tora câftărli di ananghi ș-va s-lipseascâ s-treacâ ma mulțâ an’i pânâ cându va s-poatâ s-umplâ aestu deziderat. Tora di oarâ, Bucureștiul – dzâți Mugur Isârescu – lipseaști s-aibâ ca prioritati scâdearea axichil’ei fiscalâ sub 3% dit PIB şi țânearea a disțiplinâl’ei fiscalâ.
Autor: Roxana Vasile
Apriduțearea: Mirela Biolan
