Pirmith – Gârdina ali Eri
di Zoe Papazissi Papatheodoru. Pirmith spusu di Mirela Biolan
Tașcu Lala, 04.11.2026, 21:42
Munțâl’i a Pindului suntu munțâ mușaț cu pâduri speasi ș-cu pâșuñi cu iarbâ grasâ ș-bunâ ta s-pascâ oili.
Tu unâ ahtari pâduri cu bradz analțâ ș-tufoși avea unâ vâloagâ iu cura un arâu cu apâ arați ș-bunâ.
Cathi noapti di vearâ, la aestu arâu yinea dzânili di cânta ș-giuca.
Un ficior vru s-ducâ s-li veadâ ș-el, că dzânili aesti eara multu mușati. S-ascumsi el dupâ un pom.
Dzânili vinirâ și-ș scoasirâ zâvoanili ș-ahurhirâ s-cântâ și s-gioacâ. Tuti eara daileani, ama ñica dzânâ, Eri, eara cama aleaptâ di alanti, s-u bei tu scafâ di mșeatâ ți eara.
Fciorlu ștea că, ma s-armânâ fârâ zâvon, dzânili nu mata pot s-azboairâ și s-adarâ om.
Ași că inși pi ascumtá și-l’i arâki zâvonlu ali Eri.
Tu hâryii, anda cântă câcotlu, dzânili ș-loarâ zâvoanili ș-fudzirâ di aclo, mași Eri nu putu s-fugâ.
Fciorlu u lo ñica dzânâ di mânâ, u adusi acasâ și s-ancurună cu ea.
Kirolu tricu ș-dzâna amintă un ficior.
La pâtigiuni, tutâ duñeaua giuca, maș ea nu, că nu avea zâvon și, fârâ el, nu putea s-gioacâ.
Tricurâ nica doi añi ș-dzâna amintă ș-unâ featâ. Ș-la aestă pâtigiuni, tuț giuca, mași ea nu.
– Scoalâ, ’nveastă, s-gioț!
– Em, dă-ñi zâvonlu cara vrei s-gioc! Fârâ zavon nu pot s-gioc!
Bârbatlu s-arâsi și-l’i lu deadi.
Cum ș-ul bâgă, ea azbuiră di aclo.
Ghini ma, nâsâ, cathi noapti, yinea, intra prit buhare, mitrica ñiil’i, arnea, adra mâcari ș-dapoaia fudzea.
Tahina, videa el tuti lucrili andreapti. Thamâ! Ș-dzâsi tu minti: “Va s-vegl’iu s-ved ți s-fați!” și u vidzu dzâna.
Âl’i arâki zâvonlu ș-lu arcă tu vatrâ, tu foc.
Di oara ațea ea armasi om. Și, di-atumțea, feați mulțâ ficiori ș-feati, s-umplu hoara di lumi mușatâ ș-livendâ, că eara hil’i di dzânâ: Hoara Pirivolea.
Ti ațea suntu pirvul’ieațl’i oamiñi cânâscuț tu giuneațâ.
Ș-padea iu giuca dzânili, armasi cu numa: GÂRDINA ALI ERI, iu ș-adzâ nica s-duc dzânili noaptea di gioacâ.
