Suspendari la chipitâ tru SRI
Bogdan Matei, 13.01.2017, 14:04
Prim-adjunctul a directorlui SRI, generalu Florian Coldea, fu, practic, suspendat di pi ipotisi şi easti pitricut tru una ancheta interna. Priloat di tuta presă, comunicatlu a Serviciului cundil’eadză că, “dupu informaţiili isiti tru videala tru spaţiul public tu ligatura cu domnul general-locotenent Florian Coldea şi cari fura bagati dininti la nascanti verificări preliminare, directorlu SRI, Eduard Helvig, apufusi, simfun cu procedurli, ndridzearea a unal’ei comisii speciala di verificari a eventualilor călcări a nomlui ica ali deontologie profesionala. Tru aesta noima, până la bitisearea a verificărlor, domnul general Florian Coldia easti la dispoziţie, uidisitu cu pruviderli legale, a deapoa borgili a ipotisil’ei a lui di prim-adjunctu a SRI va s-hiba priloate di directorlu, Eduard Helvig”. Comentatorl’i dzacu că informaţiile isiti tru spaţiul public” spun, maxus, ti canonada di stepsuri lansate contra al Coldea di fostul deputat Sebastian Ghiţă.
Tru una nregistrare video, difuzată di postul TV ti alu ari sum control, Ghiţă spuni că fu tru vacanţă, deadun cu adjunctul a şeflui SRI şi cu nicukira a aistui, tru hamunisiili Seychelles. Personaj sulfuros, fostu deputat social-democrat, repliat ma amanat tru un partid marginal, eurosceptic, cari nu mata intra tru Parlamentu, Ghiţă kiru fara sa-l’i si stiba torlu dit bitisita a anlui ti tricu, iar pi numa a lui s-apufusi, tru lipsă, un mandat di arestare tra fapte di corupţie. Cu una credibilitate, dimec, slagită, Ghiţă iasi dininti ca un justiţiar. El spune că fati aesti dizvăluiri tra persoanele dit kipita a SRI şi a DNA tra atea că, tru minduita a lui, tru România lucarle acatara irusi calea catra una turlie di teroare a curi varnu mumata poati sa-l’i tana keptu. Teroare, dictatură, stat poliţienesc, ripublica a procurorilor – aesti suntu, dimi, zboarali favoriti a politicienilor vizaţ di dosare di corupţie, tra cari Coldea şi şefa DNA, Laura Codruţa Kovesi, suntu nai cama detestati şi detestabile personaje publiti. Multu kiro aparent intangibil, Coldea pari, tora, cabaia vulnerabil şi suntu bot cari spun ca easti tru piricl’iu să-şi bitiseasca, la masi 45 di ani, yilipsita-l’i carieră di ofiţer di informaţii.
El agiumsi celebru tru 2005, cându coordona elibeararea a trei jurnalişti români arăkiţ tru Irak, iara prezidentul dit epocă, Traian Băsescu, alu numasi prim-adjunctu a directorlui. Atea ti, nsiamneadză, dimec, numirlu una tru plan operativ. Tru aestă hari, Coldea tanu keptu, cama di un deceniu, sum trei directori civili — Radu Timofte, George Maior şi Eduard Hellvig — şi armasi omlu forte a Serviciului şi după ti Băsescu al’i deadi preşedinţia al Klaus Iohannis. Tora, speculeadză comentatorl’i, Coldea agiumsi victima creaţil’ei isisi. Ti atea ca vrea s-hiba atel cari alu inventa pi Ghiţă, cari, cu agiutorlu a Serviciului, agiumsi, dit un IT-ist di arada, milionar tru euro, abonat la contractili cu statlu, politician influentu şi, ca deputat, membru a comisiil’ei parlamentari di control a activitatil’ei dit SRI.
Autor: Bogdan Matei
Armanipsearea: Tascu Lala
