Doi candidaţ ti căpia-a PNL
Eugen Coroianu, 01.06.2021, 14:29
Andămusiţ, dumănică, tru Consiliulu Naționalu, liberalii români apufusiră ta ş-aleagă năulu prezidentu ti Congreslu ditu 25 di yismăciuni. Va s’hibă tu antriţeari atumţea liderlu di tora a partiillei, Ludovic Orban, și premierlu Florin Cîțu. Cara naetea al Orban eara cănuscută, aţea al Cîțu fu dimăndată tăşu tu tahinima-a Consiliului. Dauli eara ama aștiptati, aţelli doi politicieañi u criscură a loru vidzută publică tru kirolu ditu soni. Actualu prezidentu feaţi viziti tru filiali tra s’caftă ndrupămintu și inşi dininti la evenimenti cu primari a partidlui, kiro tu cari premierlu avu tu amprotusa campania pro-vacţinari și criscu işearea dininti tru mass-media. Florin Cîţu spuni că PNL (prota formațiuni a guvernului di ţentru-dreapta di București) ari ananghi di unu adhilleaticu nău a deapoa nica ş-pripuni să-lu tănă partidlu nai ma pţănu optu añi la cumăndusearea-a văsiliillei.
“România s’alăxeaşti. Europa s’alăxeaşti. Lumea s’alăxeaşti. Easti ananghi şi di ună altă turlie di politicianu”, spusi primlu-ministru di tora. Ludovic Orban (ţi eara premieru anlu ţi tricu) u ghinui apofasea al Cîțu ta să-lli hibă contracandidatu la căpia a PNL, căndăsitu că aestă competiţie nu va s-aducă zñie tu lucărlu a partidlui şi niţi tu guvernari. El deadi asiguripseri că anamisa di el şi Florin Cîţu nu va s-aibă “niţi ună fisură, di itia-a alumtăllei internă, avânda tu videală obiectivili ţi voru băgari tu practico — programlu di guvernari, campania di vacținari anti COVID şi ndridzearea-a Planlui Naționalu di Redresari și Reziliență. Acă ari ună competiţie, cum easti arada, di itia că deadunu lom apofasili importanti, deadunu lomu parti la andamasili di lucru a coaliţiillei, nica spusi Orban – tru aestu kiro hiinda prezidentu la Camera-a Deputațlor.
Tră duţearea ma largu a lucărlui tru parei vini cu minduita şi premierlu. Cu tuti aesti, după cum iasi tu videală ditu spunerli a presăllei di București, atelli doi lideri numata işiră tu publică deadunu tru kirolu ditu soni, niţi barimu la yiurtusearea 146 di añi di la thimilliusearea-a PNL. Călindarea-a acțiuñilor interni ditu partid pruveadi ti kirolu 1 di cirişaru – 15 di alunaru alidzeareaaa năiloru lideri a organizaţiiloru locali, a deapoa anamisa di 1 di alunaru și 10 di agustu alidzearea a cumănduserloru pi livelu gideţeanu. După bitisearea-a aiştoru cilăstăseri, yini un kiro di 45 di dzăli tu cari candidaţllii la ipotisea di prezidentu lipseaşti s-yină cu ună moţiuni, ţi va u părăstisească dinintea-a filialiloru, cari va s-apufusească ţi candidatu ndrupăscu. Cu tuti aesti, cara ună filială va s’llia ună apofasi ti ndrupari a unlui candidat, aestă nu nsimneadză că tuţ delegaţlli aliştei lipseaşti s’voteadză tru simfunie. Andruparea easti ma multu ună căftari statutară di itia că tra s-agiungă la căpia-a partidlui, un candidatu lipseaşti s’hibă aprukeatu di nai ma pţănu 10 filiali giudeţeani.
Autoru:Eugen Coroianu
Armânipsearea: Taşcu Lala
