Dusi la Aţelu di Analtu durutlu soţu Alecu Marciuc
Soţlu a nostru Alecu Marciuc, unu di mărilli jurnalişti Radio România, dusi la Aţelu di Analtu.
Eugen Cojocariu, 13.03.2022, 13:23
Soţlu a nostru Alecu Marciuc, unu di mărilli jurnalişti Radio România, dusi la Aţelu di Analtu tru 11 di marţu 2022. Amintatu tu 4 di agustu 1941, la Cetatea Albă, Alecu Marciuc ş-ligă, practic, tută bana profesională di Radio România.
Lucră mulţă añi la Secţia Rusă şi, ma amănatu, avu unu mari contribut, tru ma marea parti la thimilliusearea Secţiillei Ucraineană Radio România Internaţional. Di numa al Alecu Marciuc s’leagă şi născănti di nai ma muşeati frăndză a postului di radio estival Radio Vacanţa, di Mamaia, ună ñică firidă di libirtati jurnalistică tru kirolu a comunismolui.
Un omu cu anami tu lucrlu cu pareia, Alecu Marciuc ş-ligă numa la Radio România Internaţional (RRI) di organizarea-a născăntoru concursuri di cultură generală, durusiti cu premii, neise ună ti anami hălati tră promovarea-a Româniillei, pritu cari ascultători RRI ditu 20 di stati a lumillei amintară excursii tru România şi agiumsiră cadealihea soţlli a văsiliillei a noastre. Ditu aesti excursii şi ditu interviurli ţi li deadiră amintătorlli alănci tomlu colectivu bilingvu, tru română şi engleză, “Dipărtărli vărnăoară nu va nă apartă”.
Cu mari miraki ti Fenomenlu OZN, Alecu Marciuc easti autorlu a tomurloru ditu şingirlu “La sinurli iu tuti suntu di căuli”, tru cari adusi dinintea a ghivăsitorloru articoli, interviuri şi materiali di arhivă, multi dit eali publicate tru presa ngrăpsită şi difuzati la radio. Alecu Marciuc fu membru şi purtătoru di zboru a Suţatăllei ti Studiulu a Fenomenilor Aerospațiali Neidintificati (ASFAN).
Om di radio di excepţie şi jurnalistu cu ahăndoasă experienţă, Alecu Marciuc thimilliusi ma multi parei şi fu un cadealihea omu di parei, cu inimă şi suflitu, di mari nica ş-ma mari, ti aţelli di ningă elu.
Nă dusi “La sinurli iu tuti suntu di căuli “, a tora, acă fudzi di ningă noi, va lli-aduţemu aminti că “Dipărtărli vărnăoară nu-ari s’n’ampartă”.
Autor: Eugen Cojocariu
Armânipsearia: Taşcu Lala
