Câţ pãradz potu s’hibã aduşi pritu PNRR?
Până tu bitisita meslui alunaru, România lipseaşti s’pitreacã turlia alãxită a PNRR.
Tașcu Lala, 16.07.2025, 18:01
Proiecti tru valoare di aproapia 6,3 miliardi di euro numata potu s’hibã adrati până tru agustu 2026, aşi cã aestea va s’hibã scoasi ditu Programlu Național di Redresare și Reziliență,iu eara bãgati trã finanțare. Hãbarea fu faptã marțã di ministrul Investițiilor și Proiectelor Europine, Dragoș Pîslaru, cari spusi că România lipseaşti s’pitreacã până tu bitisita aluştui mesu la Comisia Europinã turlia revizuită a PNRR.
Oficialu pãrãstisi concluziile ali andamasi Comitetlui Interministerial di Coordonare a PNRR şi spusi cama pi largu ti pãzãrãpserli ţi s’ţãnu tu aestu kiro aţea turlie ca Bruxelles-ul s’aproaki pripunirli autorităţilor române.
Dragoş Pîslaru explică: „Dgheafuraua anamisa di totalu a împrumuturilor, dimi 15 miliardi minus 6,3 miliardi, nsimneadzã 8,7 miliardi di euro, cari va s’armãnã tru PNRR, la cari s’adavgă, şi aestea suntu hãbãrli buni, unã pachetã di misuri cari suntu legati di rezilienţă.”
Misurli mutrescu prota ş-prota proiecti mutrinda medicina di urgenţă, pi cari li pripusi ministerul di Interne şi a curi valoare easti di 540 di miliuñi di euro, adăvgã ministrul Investiţiilor.
Dragoș Pîslaru deadi ama asigurări că România nu va s’chearã ici ţiva ditu finanţarea reprezentată di fondurile nirambursabile. Uidisitu cu aestu, va s’aibã nãscãnti ñiţ ajustări, ama nu ari niţi un piriclliu ti nibãgarea tu practico a aluştoru proiecte până tru meslu agustu 2026.
Dragoş Pîslaru: „România nu va s’chearãniţi un euro ditu componenta non rambursabilă. Aestu lucru fu revalidat şi la Bruxelles stămâna tricută şi revalidat inclusiv tru muabeţli ţi li avumu tora cându delegaţia ali Comisie Europeanã vini tru România. Avem maş niscãnti ñiţ ajustări, nãscãnti tru plus, nãscãnti tru minus, ama nu ari tu aestã oarã vãrã riscu s’avemu proiecti cari s’nu poată s’hibã bãgati tu lucru până tru agustu 2026. Tută componenta nirambursabilă easti tru aestã oarã agreată cu Comisia Europeană.”
Tu arada a lui, ministerul Transporturilor şi Infrastructurii spuni, tutunãoarã, că România nu va s’chearã niţi un euro ditu componenta ahãrdzitã aluştui dumeniu tru cadrul Planului. Dupu muabeţli tehniţi cu reprezentanţii Comisiei Europine, s-apufusi că proiectili cari armânu tru PNRR va s’hibã finanţate acutotalui ditu fonduri europeane, fără s’hibã ananghi di cofinanţari ditu bugetlu di stat.
Tru atea ţi mutreaşti proiectele cari furã scoasi parţial icã total ditu PNRR, nu va s’hibã turnatã niţi unã cumatã ditu hãrgiuerli fapti. Uidisitu cu ministerlu di resortu, easti zborlu ti 2,3 miliardi di euro investiţ până tru aestu kiro tru proiecte finalizate icã tru ateali ţi suntu tru catastisi avansatã di execuţie, cari va s’hibã lucrati ma largu pãnu tru capu pritu Programlu Transport 2021-2027 icã ditu alte izvuri europeani, tu akicãseari cu Comisia.
Muabeţli tehniţi cu experţãlli ali Comisie Europeanã pi tema alãxerloru pi cari România va s’li adarã tru Planlu Naţional di Redresare şi Rezilienţă va s’bitiseascã stămâna yinitoare. Aduţemu aminti cã pãradzlli ahãrdziţ ti România trã implementarea PNRR easti di 28,5 miliardi di euro, ditu cari 13,6 miliardi euro sumu turlie di granturi și artimaia sumu turlie di împrumuturi. Până tora, România ari loatã 10,74 miliardi di euro ditu fondurli ahãrdziti trã implementarea PNRR.
Autoru: Daniela Budu
Armãnipsearea: Taşcu Lala
