Festivallu Internaţional “George Enescu” 2025 ahurheaști
Dumânicâ, 24 di agustu, s-dișcllidi, Bucureşti, 27-a ediţie a Festivallui internaţional “George Enescu”.
Tașcu Lala, 03.09.2025, 11:16
S-ancllid 70 di ani di la moartea a marilui compozitor George Enescu, iara ediţia di estanu a festivallui internaţional ți âlli poartâ numa va s-hibâ unâ arasti ta s-aducâ dinintea a publiclui moştenirea/cllirunumia a lui artisticâ, ama ș-influența ahândoasâ ți u avu tu muzica clasicâ universalâ. Cama di 4.000 di artişțâ ditu Românie ș-ditu tutâ lumea va s-hibâ Bucureşti ta s-llia parti, duminicâ, 24 agustu, pânâ tu 21 yizmâciuñi/septembriu, la a XXVII-a ediţie a Festivallui Internaţional ‘George Enescu’.
Tu ațeali 29 di dzâli di sârbâtoari a muzicâllei clasicâ, va s-facâ cama di 95 di concerti şi spectacoli ti tuti turliili di public. Prit nai ma di simasie artişțâ câlisiț avemu dirijoarili Keri-Lynn Wilson şi Ustina Dubitsky, dirijorilli Daniele Gatti, Sir Andras Schiff, Ivan Fischer şi Cristian Mandeal, pianişțâlli Rudolf Buchbinder, Martha Argerich şi Lucas & Arthur Jussen, violoncelişțâlli Kian Soltani, Sol Gabetta şi Andrei Ioniţâ.
Festivallu ‘Georgi Enescu’ va s-aibâ cama di 45 di interpretări ditu creaţia al George Enescu, pritu cari Opera ‘Oedipe’ tu producţia ali Operâ Naţionalâ di Bucureşti, simnatâ di Stefano Poda. Simfoniili, Rapsodiili Români, Suitili ti orchestrâ, Simfonia concertantâ ti violoncel şi orchestrâ, Balada ti vioarâ şi orchestrâ şi multi alti lucrări camerali, corali şi solistiți va s-hibâ interpretati di niscânti ditu nai ma di simasie orchestri ditu lumi.
Ediţia di estanu aduți len-turlenu di lucri artistiți, cu cama di 80 di ansambluri ditu 28 di vâsilii, ți ari ș-orchestri simfoniți, coruri şi formaţii camerali ți va s-dizvârteascâ emu Bucureşti, emu tu vâsilie, ama ș-evenimenti conexi cata cumu suntu expoziţii dedicati/ahârdzâti alu George Enescu ş-proiecti inovatoari di realitati virtualâ.
Pi di altâ parti, festivallu s-tindi anaparti di sălili tradiţionali di concertu. Ași, clublu Control ditu Capitalâ va s-aibâ evenimenti iu artişțâ di simasie internaţionalâ ş-ansambluri româneşțâ di top pripunu unâ altâ turlie di experienţâ muzicalâ – libirâ, experimentalâ, tu moabeti cu jazzlu, muzica electronicâ ş-percuţia contemporanâ. Proiectul ‘Enescu tu Control’ scoati tu migdani ti prota oarâ unâ turlie di festival cu dișcllideari câtâ unu spaţiu culturalu ți, tu aesșțâ 17 di añi di ma nâpoi, agiumsi unu reper tu muzica alternativâ ditu Românie.
Nica di la prota ediţie, ditu anlu 1958, fârâ dânâseari pânâ adzâ, Radio România easti arada di Festivallu Enescu ca coproducâtor. La Radio România Muzical, singurlu postu ditu vâsilie ti muzica clasicâ, cu performanţi precunuscuti la scarâ naţionalâ ş-internaţional, puteț s-ascultaț 63 ditu concertili ți va s-dizvârteascâ Bucureşti.
Bircheavis a lucurlui al Radio România Muzical, 11 ditu concerteli a festivallui Enescu suntu acâțati ș-tu Stagiunea di varâ ali Uniuni Evopeani di Radio (EBU), ți ari înregistrări şi transmisiuni directi a ațiloru nai ma simasie festivaluri evropeani, cata cumu BBC Proms, Richard Wagner di Bayreuth i festivallu di Salzburg. La festival va s-hibâ şi orchestrili şi corurili Radio România.
Autor: Ștefan Stoica
Apriduțearea: Mirela Biolan
