Alidzeri locali parţiali tu Românie
Dumânicâ fu aleptu dimarhul gheneral a Bucureștiului, tu alidzerli cu nai ma slaba reprezentari dit isturia di dupâ 1989 ali Capitalâ a Românillei.
Tașcu Lala, 27.12.2025, 08:42
Bucureșteñilli furâ griț dumânicâ la urni ta sâ-și da psiflu ti doisprâdzațilu dimarhu ali Capitalâ dupâ Ximutarea dit 1989. Ațeali 11 mandati di pânâ tora furâ luati di optu dimarhi, iara trei dit elli furâ alepțâ di dauâ ori. Doi dit ațelli alepțâ di dauâ ori, Traian Bâsescu și Nicușor Dan, agiumsirâ prezidențâlli ali Românie.
Arada aesta, liberallu Ciprian Ciucu amintă alidzerli ți s-feațirâ duminicâ ti Dimarhia a Bucureștiului, cu niheamâ cama di 36% dit voturi. Un aprucheat a premierlui liberal Ilie Bolojan și dimarhul di tora a sectorlui 6 ali Capitalâ, aestu amintă votlu tu ținți dit ațeali şasi sectoari a Bucureștiului. El va s-aibâ un mandat ma șcurtu di alanțâ ți suntu chiola pi thesi dupâ alidzerli dit meslu cirișar di an, dirmi cama pțân di trei añi, pânâ la vadelu dit 2028.
Dupâ anvițarea a amintarillei, Ciprian Ciucu dzâsi: „Avem multi lucri te-adrari deadun la Dimarhia București și va s-avem multi proiecti te-andridzeari. Voi s-adar dit București proiectul a banâllei a meali. Și aesta nu ti un chiro șcurtu, ama ti un chiro lungu”.
La alidzerli di duminicâ, pi loclu doi fu Anca Alexandrescu, andrupâtâ di AUR, opoziţia populistâ, ultranaţionalistâ, cu aproapea 22 di proțenti, iara suțial – dimucratlu Daniel Băluță fu pi treilu loc cu vârâ 21%. Paturlu loc lu avu Cătălin Drulă (USR) cu aproapea 14 proțenti, dupâ el fu Ana Ciceală (SENS) cu vârâ 6 proțenti. Duțearea a oamiñilor la urni nu fu niți di 33%. Tu ațeali trei dețenii di ma nâpoi, easti daua oarâ cându nu s-agiundzi la aestâ țifrâ. Ama prota, tu 2008, cându duțearea dit protlu tur fu cama slabâ, s-feați dapoaia nica un tur, iu s-tricu di aestu proțentu.
Isăchili dit soni scoasirâ tu migdani că Bucureştiul aleapsi un dimarhu liberal tu alidzerli locali andreapti dumânicâ, ațea ți âlli da a premierlui Ilie Bolojan ațea hâiri ti unâ suțâlli di chiverniseari pro-ivropeanâ ți nu s-aspuni ahât vârtoasâ ş-ți administreadzâ anâhcisearea a unui candidat di extremâ-nandreapta ti cari sâ spunea că va s-amintă alidzerli, dzâți Reuters. Aghenția aduți aminti că thesea, influentâ, eara libirâ nica dit meslu mai, anda independentul țentristu Nicuşor Dan amintă alidzerli prezidenţiali ți s-feațirâ di dauâ ori, dupâ un an di anda luă doilu mandat di dimarhu, iara sondajili aspunea că Bucureştiul nica niheamâ și vrea s-agiungâ prota capitalâ dit Uniunea Ivropeanâ cumândâsitâ di un politițian di extremâ-nandreapta. Şi tut Reuters cundilleadzâ că scrutinlu di dumânicâ s-feați dupâ un an di anda România nu pricunuscu protili alidzeri prezidenţiali di furnia a șubeillei că Arusia s-minti tu alidzeri, avândalui un candidat di extremâ-nandreapta.
Alidzeri locali parţiali ti thesea di dimarhu s-feațirâ duminicâ ş-tu alti 12 localităţ dit Românie, iara tu giudeţlu Buzău, Marcel Ciolacu, deputat PSD ș-ațel ți fu prezidentul a suțial-dimucrațlor, amintă prezidenția a Consiliului Giudețean, cu ma multu di giumitati dit voturi. Lipseaști nica s-dzâțem că dit cirișar 2024, dirmi tu vârâ un an și giumitati, s-feațirâ optu turlii di alidzeri iu bucureșteñilli furâ cllimaț la urni – prezidențiali, locali și ivroparlamentari, referendum local și parlamentari.
Autor: Daniela Budu
Apriduțearea: Mirela Biolan
