Hăbări ditu bana românească şi internaţională
COMEMORARI. Luni, cându România comemoreadză 32 di ani di la aputrusearea a minerilor viniţ București, tu dzălili di 13 și 15 cirişaru, premierul a văsiliillei Nicolae Ciuca pitricu un mesaj tru cari spuni că maratonlu-demonstrație a societatillei ţivile contra a neocomunismului fu kisatu di instigarea a românilor contra a românilor. Societatea românească vărnăoară nu lipseaşti s’agiungă victima a diversiunilor și a propagandăllei arădoacică, spuni șeflu a Guvernului a Româniillei. Aoa şi 32 di ani tru aestă dzuuă, apăndăsinda a unăllei cllimari a autorităților di atumţea, minerllii ditu Valea Jiului ditu centrul-vestul României au intervenit cu brutalitate contra protestatarilor iriñieatiţ antiguvernamentali ditu misuhorea a Bucureștiului. Patru oamiñi fură tufikisiţ și cama di 1.000 fură pliguiţ, diadunu cu ma multi arestări abuzive. Dosarlu ti volta a minerilor, pi thimellilu a curi eara pitricuţ tu giudico prezidintul di atumtea a văsiliillei Ion Iliescu, fostul premier Petre Roman și Virgil Magureanu, fostul șef al serviciului di informații a văsiliillei, lipseaşti ahurhitu di la zero după ţi fu acăţatu tru isapi rechizitoriul, nul di drept.
Newsroom, 13.06.2022, 19:22
TENIS. Românca Simona Halep, cap di serie a daua la turneul WTA 250 di Birmingham, agiucă adză cu Lesia Tsurenko ditu Ucraina tru primlu tur ali competiție. Tut adză, Gabriela Ruse ditu România agiucă cu Qiang Wang ditu China, kiro tru cari treia româncă ditu competiție, Sorana Cîrstea va s’agioacă marţă cu Shelby Rogers ditu SUA.
POLIMU. Amnesty International u stipsi Rusia ti crime di polimu tru Ucraina, susțănânda că sute di ţivili fură vătămaţ tru atacuri fără ñilă cu topă crehtă contra a căsăbălui Harkov, relateadză AFP. După investigații fapti minutişu, aest ONG ti ndrepturile omului spuni că află dovedz că forțili aruse ufilisiră băruti cu dispersie interdz4să pi scară largă.
Oameni fură vătămaţ tru casele lor și pe geadii, tru locurli di agioc și tru mirminţă, tru kirolu anda aştipta la coadă ti agiutoru uminitaru ică la ancupărări ti alimente și medicamente”, spuni un consilier principal di apandisi la criză ali Amnesty International. Acă Rusia nu easte parte niţi la Convenția mutrinda munițiile cu dispersie și niţi la Convenția mutrinda minil antipersonal, ndreptul internațional umanitar nu da izini ti atacurile fără discernământ și ufilisearea a armelor cari sunt nediscriminate prin natura a lor.
ARIFUGAT. Aproapea 7.000 di cetățeni ucraineni intrară tru România pritu punctele a llei di sinuru dumănică, 12 cirişaru, cu 26% ma pțăñi andicra di dzua di ma ninti, dimăndă Inspectoratul General ali Poliției di Sinuru. Di la ahurhitaa a conflictului ditu Ucraina, aproximativ 1,2 miliuñi di cetățeni ucraineni intrară tru România.
Autoru: Udălu a hăbărloru
Armânipsearea: Taşcu Lala
