Hăbări ditu bana românească şi internaţională
Grevă. Tru România, lucrătorlli ditu educație ndreapsiră adză ună grevă di avertisment di dauă săhăţ. Sindicatele dimăndară că protestul fu un cicioru tru conflictul di lucru nkisitu di itia a tiñiiloru di cafi mesu ñiţ şi di xikea a investițiilor tru domeniu. Aeșţă fuvirsescu că va s’ahurhească luni, 22 mai, ună grevă totală. Ministrul di linie Ligia Dica și liderlli sindicali dimăndară dupu muabeţli ţi li avură adză, că prota andamasi ali comisie apufusită ti negocierea a unlui nău contractu colectiv di lucru tru nviţămintu va s’facă gioi.
Newsroom, 17.05.2023, 16:46
Diplomaţie. România easti cabai angajată tru combaterea la iţi turlie di extremismu și discursu instigator la ură acasă și iuţido tu lumi și ndrupaşti tuti proiectele europene ahărdziti ti combaterea antisemitismului. Declarația fu faptă adză tahina di premierul Nicolae Ciucă, la andamusea di tiñie comună a Parlamentului ali Românie, cari nsimneadză 75 di ani di relații diplomatice nidănăsiti anamisa di România și Statul Israel. “Israelul easti unul ditu aţelli nai ma vărtoşi și importanți parteneri ali României tru Orientul di Mesi, ama și statul cu cari avem ună ligătură economică tut ma vărtoasă. Minduescu, ama, că potențialul alăxerloru comerciale easti multu ma mare”, spusi Nicolae Ciucă. Prezent la andamasea di București, Prezidentulu a Parlamentului a Israelului, Amir Ohana, declară că România fu una ditu protili văsilii cari pricunuscu Statul Israel și feaţi jgllioati importanti tră comemorarea Holocaustului, atea ti dimonstrează angajamentul a llei tru combaterea antisemitismului. Uidisitu cu spusa al Amir Ohana, legăturile anamisa di România și Israel suntu ma bune ca vărnăoară”.
Consiliul Europei. La Summit-ul a Consiliului Europei di la Reykjavik, Islanda, prezidentulu Klaus Iohannis prezidă, marță dicseară, deadunu cu prim-ministrul a Luxemburgului, Xavier Bettel, measa arucutoasă Protejarea democrației tru greulu kiro — riscuri, reziliență și reangajare. Klaus Iohannis spusi că, prin agresiunea ilegală contra ali Ucraina, Rusia lu călcă flagrant ndreptul internațional și fuvirsi greu sistemul democratic, sumliniinda că aestă criză, nai ma greaua di la bitisita a Doilui Polimu Mondial, anvărtuşi unitatea și diterminarea lumillei, democrațiilor să-și veaglle turlia di bană democratic, pritu ascumbusearea ti agiutari ali Ucraină și a cetățenilor a llei și tru agiutorlu a tutăloru aţiloru cari alumtă tră libertate, dimocrație și contra a intimidarillei, autoritarismului și tiraniei. Sdză, tru a daua dzuuă a Consiliului Europăllei Summit, Prezidentulu Klaus Iohannis va s’reitereadză angajamentul României andicra di sistemul Convenției Europene ti Ndrepturli a Omului și va s’evidențiadză rolu pi cari lu avu Consiliul Europei tru aţelli 30 di ani di apartenență a văsiliillei la organizație tră anvărtuşearea a unei democrații stabile și matură.
Autoru: Udălu a hăbărloru
Armânipsearea: Taşcu Lala
