Hăbări ditu bana românească şi internaţională
GREVA – Greva totala tru sistemul di invatamant va s’ducă ma largu si saptamana yinitoare. Lidirlli sindicali ndregu un nău miting la București, dupu acțiunilor di protest di vineri tru ma mulţă căsăbadz ditu văsilie. Lucrătorlli ditu domeniul ali educație nu sunt haristusiţ di oferta Guvernului cu bonusuri di 500 di euro. Guvernul apruke s’crească tiñiili di cafi mesu a personalui auxiliar cu 9%, oferinda-lă și prime di 200 di euro. Sindicatili căftară ună creaştiri a tiñiiloru di cafi mesu cu 25%, di lu alină tiñiia di cafi mesu la nivel di intrare la aproximativ 600 di euro. Greva ahurhi pi 22 mai, lucrătorlli ditu nviţămintu exprimânda-şi niifharistuserli tu ligătură cu tiñiili di cafi mesu şi condiţiile di lucru. Lidirlli sindicali feaţiră timbihi că greva va s’ducă ninti ma s’nu lă tiñisească căftărli.
Newsroom, 27.05.2023, 18:14
HAGILAKI – Aproximativ 300.000 di creștini romano-catoliţ ditu lumI, inclusiv prezidintulu ali Ungarie, Novak Katalin, loară parti sâmbătă la hăgilăkea ti Arusaliili catoliţi la Șumuleu Ciuc (centrul României). Organizatorii s’așteaptă s’llia parti catoliţ ditu toată Europa, maxus ditu Ungaria, ama și ditu Australia și SUA. Lugursită nai ma marea di aestă turlie ditu Europa Centrală și di Est, hăgilăkea ari ună istorie di pite 450 di ani și easte didicată ti ayalma ţi faţi thami a Stă Măriillei ditu bisearica franciscană locală. Uidisitu cu legenda, tru 1567, prințul transilvanean Ioan Sigismund avea minduită s’convertească cu zorea populația româno-catolică locală ditu Ciuc, Gheorgheni și Cașin la unitarism. Maş cu agiutorul a ayalmăllei făcătoare di thami oamiñilli putură s’ţănă keptu şi să u ţănă a loru pisti străaușească. Di atumţea, tu cafi aprindu di Arusalii, catoliţlli ditu lumea nkisescu hăgilăki la Bisearica a Sămtăllei Maria ditu Șumuleu Ciuc, iu easti ayalma făcătoari di thami.
SUMMIT – Germania va s’muta sistemul di apărare antirachetă Patriot, dizvărtitu tu aestu kiro tru Slovacia, tru Lituania, tra s’veaglle Summitul NATO ditu alunaru di Vilnius, diclară ministrul german al apărari. Germania ari arădăpsită dauă unități Patriot tru Slovacia și alti trei tru Polonia. Cancelarul a Germaniei, Olaf Scholz, diclară că summitul va s’hibă ahărzitu maxus ti asistența limbidă tră Ucraina. Secretarul general al NATO, Jens Stoltenberg, pricunuscu aoa şi ndauă dzăli că Aliații suntu ampărțăț tu ligătură cu căftarea ali Ucraină ti adirari la NATO, un subiect cari va s’hibă zburătu la summitul di la Vilnius. Stoltenberg năpoi adusi aminti că tuti apofasili NATO lipseaşti s’hibă unanime.
ALIDZERI — Dzăţ di ñilli di susținători a prezidintului interimar ali Turchie, Recep Tayyip Erdoğan, loară parti la un miting di susțănere la Istanbul, ninti di turlu prezidințial di dumănică. Prezidintulu Erdogan lă căftă a susținătorilor s’voteadză ti un Parlamentu și ună prezidinţille unită. Rivalu a lui di opoziție, Kemal Kılıçdaroğlu, lidirul a Partidului Popular Republican, gri un zboru dinintea a susținătorloru a lui la Istanbul, cundillinda problemele economice cu cari s’ampuliseaşti Turchia tru aestu kiro. Nă aduţemu aminti că Recep Tayyip Erdoğan amintă aproape 50% ditu voturi tru primul tur, kiro tu cari Kemal Kılıçdaroğlu amintă 45% ditu voturi. Kılıçdaroğlu conduţi ună suţată di partidi di opoziție. La putere tru ultimii 20 di ani, Erdoğan pari s’hibă aproapea tra ş-asiguripsească un nău mandat di ţinţi ani ca prezidintu, acă mulță s’așteaptă s’hibă ună cllimari aprukeată. Pisti 64 di milioane di turţă suntu aștiptaț s’agiungă la urne dumănică, ditu cari 3,4 milioane tru diaspora. Uidisitu cu isăkili, prezența la vot tru Diaspora easti di aștiptat s’hibă ma mari andicra di protlu tur.
Autoru: Udălu a hăbărloru
Armânipsearea: Taşcu Lala
