Hăbări ditu bana românească şi internaţională
MUABETS. Guvernul di București și sindicatele ditu sistemul di truvățământu ditu văsilie apufusiră un călindari di implementare a alăxerloru tru Nomlu a salarizarillei tăxiti di Executiv cu scupolu ta s’dănăsească acutotalui greva totală a profesorilor, cari ţănu trei stămâni. Uidisitu cu năulu premier, Marcel Ciolacu, ministrulu ali Educației Ligia Dica și reprezentanțălli sindicali, tiñia di cafi mesu a unui profesor debutant va s’aibă la thimelliu tiñia di cafi mesu di mesi ditu România. Liderllii sindicali va s’aibă ună nauă andamasi di muabeţ cu miniștrilli ali Educație, a Lucărlui și Finanțelor cu scupolu ta s’ndreagă ună nauă grilă di salarizare. După ţi s’agiumsi la un acordu, aesta va s’hibă prezentată a coaliției di guvernământ și prota turlie a yinitorlui nomu a tiñiiloru di cafi mesu s’hibă dimăndată di ministrul a Lucărlui pănă tu 15 di alunaru. După aprobarea a guvernului, proiectul va s’hibă niintatu a Parlamentului tru sesiunea di toamna.
Newsroom, 17.06.2023, 20:08
PLOI. Ploile torenţiale feaţiră zñie tu dzălili ditu soni tu ma mulţă căsăbadz şi hori ditu sud-vestul a văsiliillei, iu multi nicukirati şi dzăţ di ictări di ag4ri fură nicati. Echipe di pompieri și jandarmi feaţiră intervenţie ti să scoată apa ditu nicukiratili ţi avură zniie. Urdinarea rutieră și pi calea di heru fu dănăsită ti şcurtu kiroama tu aestu kiro Comitetul Național tră Situații di Urgență, convocat viniri seara di premierul Marcel Ciolacu, vulusi aprovizionarea cu alimente și apă a familiilor zñiipsiti di ateali ditu soni nicări.
FOTBAL Naționala di fotbal a Românillei bitisi viniri dicseară la Pristina cu ună remiză fără goluri contra aali parei ditu Kosovo. Meciul angreacă tră Grupa 1 a preliminariilor la EURO 2024, România hiinda nică niazvimtă după trei meciuri: dauă victorii și un egal. Kosovo ari trei puncte, iara echipa di fotbal ali Românie antrenată di Edward Iordănescu va s’agioacă yinitorlu meci contra ali Elveţie la Lucerna. Protili dauă echipe ditu grupă va s’califică la turneul final.
LIGATURI. Tru kirolu 14-16 cirişaru, căsăbălu românescu Timișoara, cari easti și capitală europeană a culturăllei tru aestu an, fu nicukirlu a aţillei di a 26-ţa sesiuni a Comisiei guvernamentale româno-ghirmani tră problematica a etniţlor germani ditu România. Secretarul di stat Daniela Gitman cundille nivelu excelentu a ligăturloru româno-ghirmani ţi au la thimelliu pistipsearea di dauli părţă, dialog politic niacumtinatu, dinamică economică tru creastire și ligături interumane multu streasi. Oficialu român cundille contribuția semnificativă a minoritatillei ghirmani ditu România și a comunitatillei românești ditu Germania la anvărtuşearea a dialogului bilateral și rolu a lor di catalizator tru coopeararea anamisa di ateali dauă văsilii. Tutunăoară, Gitman apruke apofasea a guvernului german ta s’ducă niti agiutorlu di 5,4 miliuñi di euro tră etniţlli germani ditu România.
Autoru: Udălu a hăbărloru
Armânipsearea: Taşcu Lala
