Kivernisea – 100 di dzâli di lucru
Premierlu român Ilie Bolojan scoasi tu migdani isapea a protiloru 100 di dzâli di lucru.
Tașcu Lala, 25.10.2025, 06:57
La ancllidearea a 100 di dzâli di anda u lo kivernisea, premierlu român scoasi tu migdani isapea a misurilor bâgati tu practico, angricândalui ma multu pi ațeali ți vrea ta s-ñicureadzâ xikea bugetarâ multu mari. Ilie Bolojan xikisi că ari ”dauâ lucri constanti, ți niți unâ kivernisi nu va s-poatâ s-nu li adarâ tu kirolu ți yini: criștearea a loarillei di pâradz și scâdearea a hărgiloru di lucru”. Tu minduita a lui, aesti misuri va s-asiguripseascâ “bugeti cu zigâ” și finanțarea a investițiilor. Şeflu a Executivlui cundille că, ma s-nu scadâ cușia hărgili fixi, ari piricllu pâradzlli artimai ți s-adunâ ditu taxi, impoziti şi misurli ți s-loarâ pânâ tora s-hibâ hârgiuiț unâ ș-unâ.
Premierlu andrupaști fâțearea unâ a niscântoru autorităț și aghenții ică a niscântoru serviții. România apruftusi s-nu agiungâ tu catastisea lai cându s-nu poatâ s-pâlteascâ, birkeavis a misurilor aprukeati di pțânu kiro di kivernisi, di cara ari unâ xiki bugetarâ di cama di 9%, maca kivernisea llia pâradz pțâñi, anda hârgiuiaști para multu, dzâsi nica elu. Minduita a lui easti că, fârâ ahtări misuri, România vrea s-hibâ tu unâ catastisi lai, iara zñia va u tragâ țetățeañilli.
Ilie Bolojan: “Aghenţiili di rating aspusirâ că adrăm ațea ți eara ananghi ș-fu unâ protâ jgllioatâ ta s-amintăm diznău pistea pi Românie şi, minduescu mini, ta s-amintăm diznău pistea a țetățeañiloru a noșțrâ dzâcândalui averlu. Nu fu sârțâlli ațea ți s-feați, ama minduescu că furâ niscânti misuri di loari a borgillei că va s-adrămu lucru și s-dămu giuiapi dapoaia, misuri ți vrea bâgari tu practico. Un elementu di simasie easti s-bâgămu icunumia pi unu thimellu sânâtosu. Aesta nu va s-dzâcâ s-avemu ma mulțâ oamiñi tu icunumia dealihea şi, pritu misurli ți s-li lomu, s-dămu curai s-avemu ma mulțâ arugaț ș-aesta nu putemu s-u adrămu dicât mași cu ndauâ misuri.”
Ilie Bolojan zburâ ș-ti ananghea di crișteari a ilikillei di scuteari tu pensie ninti di vadè – lucru ți nu poati s-hibâ andrupâtu icunomicu și ți nu easti ndreptu ditu punctu di videari suțialu, scâdearea a kirolui di șomaj, a mirakillei di șideari acasâ ti lângoari cu ndreptu di la yeatru și duțearea ma largu a reformiloru tu administraţie, sânâtati şi educaţie. Premierlu cundille simasia a reformâllei tu administrația localâ și țentralâ, dzâcândalui că lipseaști s-aflâ formula constituționalâ ta s-bagâ tu practico dânâsearea di loari di pâradz emu ditu pensie, emu ditu tiñia di cathi mesu.
Din opoziţie, senatorlu AUR Petrişor Peiu feați tâmbihi că furâ geaba loati tuti aesti misuri serti, maca xikea bugetarâ armâni la un livel ți ș-aduți cu ațelu di anu.
Petrişor Peiu: “Tâlle ifculiili fiscali ditu IT, construcţii, agriculturâ şi industria alimentarâ. Scâdzu la giumitati praglu di loari di pâradz ti microîntreprinderi. Criscu TVA-ul cu dauâ puncti proțentuali. Criscu şi cota scâdzutâ di TVA cu dauâ puncti proțentuali. Bâgă CASS la cama oarfânili categorii suțiali. Criscu norma a profesorilor cu dauâ sâhăț. Tutâ vâsilia tradzi.”
Bitisearea a digitalizarillei a ANAF ş-a ghimbrukillei, dânâsearea ali evaziuni fiscalâ ş-a lucurlui pi laia armânu ma largu lucri di prota thesi ti kivernisi, adâvgă Ilie Bolojan. Tutnâoarâ, Kivernisea ş-pripuni s-creascâ prezenţa a companiilor publiți pi bursâ, avândalui ași lucri di simasie ți pot s-hibâ hâirlâtiți.
Autor: Mihai Pelin
Apriduțearea: Mirela Biolan
