Coiflu şi biligițli dațiți s-turnarâ acasâ
Furâ aflati piesili di yișteari dupâ furlâticlu ți s-feați, an, la Muzeulu Drents dit Assen, ș-tora s-turnarâ acasâ, tu Românie.
Tașcu Lala, 11.05.2026, 07:23
Coiflu di Coţofeneşti şi dauâ biligiț dațiți di malmâ, ți furâ aflati di cara furâ arâkiti la Muzeulu Drents dit Olanda, s-turnarâ tu vâsilie. Treia biligicâ nu fu, ama, aflatâ nica. Piesili di yișteari furâ transportati tu condiţii di securitati maximâ la Muzeulu Naţional di Istorie di Bucureşti, iu furâ scoasi tu migdani ta s-li veadâ duñeauapânâ tu 3 di mai. Coiflu va s-intrâ, dapoaia, tu un proțes di restaurari, di cara partea di pisuprâ ari toarâ di ñiț goadi. Ta s-hibâ adrat cum eara vârâoarâ s-dizvârteaști ş-unâ campanie di donaţii.
Ministrul a Culturillei, Demeter András István, s-hârsi că furâ aflati lucrâli di yișteari: „Patrimoniul va viglleari cu sârțâlle, iuțido iu s-aflâ ş-adus nâpoi aclo iu ari acutotalui hâiri. Tut aestu episod nâ aduți aminti cât expus poati s-hibâ patrimoniul. El poati s-veadâ zñie di preșcăville, di traficlu contra a nomlui, di niaveari angâtan, di agârșari. Tamam ti ațea, viglearea a lui nu poati s-armânâ maș unâ borgi abstractâ ş-niți unâ ți lipseaști s-u aibâ maș spețialişțâlli ică instituţiili. Easti unâ borgi ți u ari tutâ soțietatea, ama și instituţiili au, tu arada a lor, unâ borgi ahoryea, ațea ta s-agiutâ ta s-putem s-umplem tuț borgea kino ți u avem.”
Coiflu di Coţofeneşti şi ațeali trei biligiț ți furâ arâkiti, feațirâ parti dit expoziţia „Dacia – Loclu a Malmâllei ș-a Asimillei” pârâstâsitâ an, Olanda. Tamam ninti di bitisearea a expoziţillei şi turnarea a exponatilor la Muzeulu Naţional di Istorie di Bucureşti, tu yinar 2025, trei bârbaţ plâscânirâ, tu kiro di noapti, intrata di dinâpoi a muzeului dit Assen şi, ti maș ndauâ minuti, inșirâ cu ațeali patru artefacti româneşțâ.
Tu yizmâciuñi 2025, ministerlu ali Culturâ dit Românie deadi hâbarea că lo di 5,7 miliuni di evradz, pâradz-compensație ti lucârli culturali arâkiti. Di cara furâ turnati trei dit ațeali patru piesi, România lipseaști s-da tora nâpoi unâ parti dit pâradzlli ali companie di asigurari.
Furlâticlu âlli cârti româñilli și dusi la unâ mari operațiuni di câftari tu Olanda. A că treilli furi furâ acâțaț dupâ ndauâ dzâli, loclu iu eara prada armasi multu kiro nicunuscut. Pân’ tu soni, tu ahurhita a meslui apriir, autorităţli olandezi deadirâ hâbarea că aflarâ coiflu şi dauâ dit ațeali trei biligiț arâkiti. Nafoarâ di niscânti toarâ di niheamâ goadâ ți li ari coiflu pisuprâ, lucârli eara multu buni. Loclu iu easti treia biligicâ di malmâ armâni ma largu nicunuscut. Aesti lucri antiți furâ afalti dupâ unâ achicâseari anamisa di autorităţli olandezi și doi dit suspecţâ, treilu om suspectu dzâți că nu avu lucru tu aestu furlâtic. Treilli bârbaţ suntu câftaț penal ti furlâtic și aspârdzearea di piesi di yișteari a muzeului, iara proțeslu a lor s-dizvârteaști tu Olanda.
