Mesaji di Dzuua Naționalâ ali Românie
Dzuua Naționalâ ali Românie avu paradi, țeremonii militari şi relighioasi, cata cum și manifestări culturali.
Tașcu Lala, 02.12.2025, 17:13
Protu di Andreu, dzuuâ ți easti yiurtusitâ cathi an, ahurhiindalui dit 1990, ca Dzuuâ Naționalâ ali Românie, easti unâ dzuuâ a muștinarillei, a solidaritatillei ș-a aduțearillei aminti a alumtâllei ti unitati și identitati naționalâ. Tora s-ancllid 107 di añi di anda s-feațirâ unâ Transilvania, Banatlu, Crișana și Maramureșlu cu România, Marea Andamusi Naționalâ di Alba Iulia tu 1 di andreu 1918, hiindalui luyursitâ unâ dzuuâ ți apufusi “unitatea naționalâ a tâtâlor româñilor”.
Paradi, ama şi țeremonii militari şi relighioasi s-feațirâ tut tutâ vâsilia, iara nai ma marea fu andreaptâ Bucureşti, iu tricurâ pri dinintea a oamiñilor 3.000 di aschirladz româñi şi xeñi dit structurli NATO, cu nai ma modernili echipamenti. Unâ țeremonie di ascheri ti mirachi s-feați ș-tu Alba Iulia, iu loarâ parti cama di 1.000 di aschirladz, tamam ș-polonezi dit structurli soați, cu tehni terestri di alumtâ, tu chirolu anda Custanța tu mengâ furâ nafțâlli. Duñeaua putu sâ-lli mutreascâ, ama, ş-ațelli dit Forţili di pisti Loc și dit Aerâ, deadun cu aschirladzlli xeñi di la Baza „Mihail Kogâlniceanu”, iara Timișoara, ñilli di oamiñi loarâ parti la paradi ș-la trițearea pri dininti a schirladzlor cu lumbărdzâ.
“Yiurtusim adzâ Unirea di la 1918, unâ hopâ istoricâ ti Românie, unâ hopâ iu yislu di bârnuri s-feați dealihea. Aesta va ta s-dzâcâ, pi di unâ parti, că nu yinim di iuva, că avum unâ suțietati ş-unâ clasâ politicâ axi șâ-și aducâ deadun energiili ti un scupo, va ta s-dzâcâ că memoria aluștor oamiñi nâ bagâ zori ș-a nauâ s-dăm s-him tutu ahât gioñi cât furâ elli”, dzâsi tu mesajlu a lui ți lu aspusi a româñilor dit vâsilie ș-di iuțido prezidentul Nicușor Dan.
Șefanlu a cratlui lâ gri a oamiñilor s-hibâ imiri şi s-u țânâ ziga tu moabețli ti cripărli ți li tradzi tora suțietatea: “Câlisearea a mea ți lâ u adar a tâtâlor easti s-dipunem tuț la livellu a boațillei, sâ zburâm aștirnut și s-u țânem ziga tu moabețli ti problemeli ți li ari suțietatea a noastâ – fârâ s-dăm s-li ascundem, ama s-armânem imiri şi tu echilibru. Vâ câlisescu, tutnâoarâ, s-dăm s-nâ ascultăm un-alantu. Pi ninga halatlu ți va s-facâ, va s-aflăm ș-puncti di videari ți li avem deadun pi cari putem s-li filisim ta s-nâ achicâsim.”
Di Dzuua Naționalâ ali Românie, lideri dit tutâ lumea pitricurâ mesaji ti populu român. Prezidentul american Donald Trump cundille ligâtura streasâ di dauli părțâ și rolu strateghic ali Românie tu reghiunea ali Amari Lai și tiñia ți u ari ti lucurlu românescu la sigurlâchea reghionalâ ș-tu arada NATO. Și prezidentul ali Galie, Emmanuel Macron, pitricu un mesaj iu zburaști ti sigurlâchi ca punctu țentral a ligâturâllei di dauli părțâ.
Prezidenta ali Republicâ Moldova, Maia Sandu, adusi aminti simasia a momentului istoric dit 1 di Andreu 1918. Liderlu di Kiev, Volodimir Zelenski, dzâsi că tiñiseaști andruparea susto ali României ti suveranitatea ș-integritatea teritorialâ ali Ucrainâ, tu aestâ catandisi di polim, ți fu anchisit di Federația Aruseascâ.
Autor: Corina Cristea
Apriduțearea: Mirela Biolan
